Yathā pana tebhūmikakusalāni attano vipākaṃ adhipatiṃ labhāpetuṃ na sakkonti, na evaṃ lokuttarāni. Kasmā? tebhūmikakusalānañhi añño āyūhanakālo, añño vipaccanakālo, tenetāni attano vipākaṃ adhipatiṃ labhāpetuṃ na sakkonti. Lokuttarāni pana tāya saddhāya tasmiṃ viriye tāya satiyā tasmiṃ samādhismiṃ tāya paññāya avūpasantāya apaṇṇakaṃ aviruddhaṃ maggānantarameva vipākaṃ paṭilabhanti, tena attano vipākaṃ adhipatiṃ labhāpetuṃ sakkonti.

Yathā hi parittakassa aggino gataṭṭhāne aggismiṃ nibbutamatteyeva uṇhākāro nibbāyitvā kiñci na hoti, mahantaṃ pana ādittaṃ aggikkhandhaṃ nibbāpetvā gomayaparibhaṇḍe katepi uṇhākāro avūpasantova hoti, evameva tebhūmikakusale añño kammakkhaṇo, añño vipākakkhaṇo, parittaaggiṭṭhāne uṇhākāranibbāpanakālo viya hoti. Tasmā taṃ attano vipākaṃ adhipatiṃ labhāpetuṃ na sakkoti, lokuttare pana tāya saddhāya .pe. Tāya paññāya avūpasantāya maggānantarameva phalaṃ uppajjati. Tasmā taṃ attano vipākaṃ adhipatiṃ labhāpetīti veditabbaṃ. Tenāhu porāṇā "vipāke adhipati natthi ṭhapetvā lokuttaran"ti.

@4 cha.Ma. tena tāni 5 cha.Ma. aviraddhaṃ 6 cha.Ma. uṇhabhāvanibbutakālo viya