[๘๐๗] อฏฺฐวิเธน ญาณวตฺถุนิทฺเทเส โสตาปตฺติมคฺเค ปญฺญาติ โสตาปตฺติมคฺคมฺหิ ปญฺญา. อิมินา สมฺปยุตฺตปญฺญาว กถิตา. เสสปเทสุปิ เอเสว นโยติ.

อฏฺฐกนิทฺเทสวณฺณนา นิฏฺฐิตา.

๙. นวกนิทฺเทสวณฺณนา

[๘๐๘] นววิเธน ญาณวตฺถุนิทฺเทเส อนุปุพฺพวิหารสมาปตฺตีสูติ อนุปุพฺพวิหารสงฺขาตาสุ สมาปตฺตีสุ. ตาสํ อนุปุพฺเพน อนุปฏิปาฏิยา วิหาริตพฺพฏฺเฐน อนุปุพฺพวิหารตา, สมาปชฺชิตพฺพฏฺเฐน สมาปตฺติตา ทฏฺฐพฺพา. ตตฺถ ปฐมชฺฌานสมาปตฺติยา ปญฺญาติอาทโย อฏฺฐ สมฺปยุตฺตปญฺญา เวทิตพฺพา. นวมา ปจฺจเวกฺขณปญฺญา. สา หิ นิโรธสมาปตฺตึ สนฺตโต ปณีตโต ปจฺจเวกฺขมานสฺส ปวตฺตติ. เตน วุตฺตํ "สญฺญาเวทยิตนิโรธสมาปตฺติยา วุฏฺฐิตสฺส ปจฺจเวกฺขณญาณนฺ"ติ.