วิปริเยเสสุ ๑- อนิจฺจาทีนิ วตฺถูนิ นิจฺจนฺติอาทินา นเยน วิปรีตโต เอสนฺตีติ วิปริเยสา, สญฺญาย วิปริเยโส สญฺญาวิปริเยโส. อิตเรสุปิ ทฺวีสุ เอเสว นโย.

อนริยโวหาเรสุ อนริยโวหาราติ อนริยานํ ลามกานํ โวหารา. ทิฏฺฐวาทิตาติ "ทิฏฺฐํ มยา"ติ เอวํ วาทิตา. เอตฺถ จ ตํตํสมุฏฺฐาปิกเจตนาวเสน อตฺโถ เวทิตพฺโพ. สห สทฺเทน เจตนา กถิตาติปิ วุตฺตเมว. ทุติยจตุกฺเกปิ เอเสว นโย. อริโย หิ อทิสฺวา วา "ทิฏฺฐํ มยา"ติ ทิสฺวา วา "น ทิฏฺฐํ มยา"ติ วตฺตา นาม นตฺถิ, อนริโยว เอวํ วทติ, ตสฺมา เอวํ วทนฺตสฺส เอตา สห สทฺเทน อฏฺฐ เจตนา อฏฺฐ อนริยโวหาราติ เวทิตพฺพา.

ทุจฺจริเตสุ ปฐมจตุกฺกํ เวรเจตนาวเสน วุตฺตํ, ทุติยํ วจีทุจฺจริตวเสน.