2. Pañhāpucchakavaṇṇanā

[221] Pañhāpucchake sabbesampi indriyānaṃ kusalādivibhāgo pālinayānusāreneva veditabbo.

[223] Ārammaṇattikesu pana sattindriyā anārammaṇāti cakkhusotaghānajivhākāyaitthīpurisindriyāni sandhāya vuttaṃ. Jīvitindriyaṃ pana arūpamissakattā idha anāgataṃ. Dvindriyāti dve indriyā. Sukhadukkhadvayaṃ sandhāyetaṃ vuttaṃ. Taṃ hi ekantaparittārammaṇaṃ. Domanassindriyaṃ siyā parittārammaṇaṃ siyā mahaggatārammaṇanti kāmāvacaradhamme ārabbha pavattikāle parittārammaṇaṃ hoti, rūpāvacarārūpāvacare pana ārabbha pavattikāle mahaggatārammaṇaṃ, paṇṇattiṃ ārabbha pavattikāle navattabbārammaṇaṃ. Navindriyā siyā parittārammaṇāti manindriyajīvitindriyasomanassindriyaupekkhindriyāni ceva saddhādipañcakañca sandhāya idaṃ vuttaṃ. Jīvitindriyañhi rūpamissakattā anārammaṇesu rūpadhammesu saṅgahitampi arūpakoṭṭhāsena siyāpakkhe saṅgahitaṃ.

Cattāri indriyānīti sukhadukkhadomanassaaññātāvindriyāni. Tāni hi maggārammaṇattike na bhajanti. Maggahetukanti sahajātahetuṃ sandhāya vuttaṃ. Viriyavīmaṃsajeṭṭhakakāle siyā maggādhipati, chandacittajeṭṭhakakāle siyā navattabbā.