2. Abhidhammabhājanīyavaṇṇanā

[725] Tattha tisso paṭisambhidā lokiyā, atthapaṭisambhidā lokiyalokuttaramissakā. Sā hi nibbānārammaṇamaggaphalañāṇānaṃ vasena lokuttarāpi hoti, abhidhammabhājanīyaṃ kusalākusalavipākakiriyānaṃ vasena catūhi vārehi vibhattaṃ. Tattha yattakāni heṭṭhā cittuppādakaṇḍe kusalacittāni vibhattāni, tesaṃ sabbesampi vasena ekekasmiṃ cittaniddese catasso catasso paṭisambhidā vibhattāti veditabbā. Akusalacittesupi eseva nayo. Vipākakiriyāvāresu vipākakiriyānaṃ atthena saṅgahitattā dhammapaṭisambhidaṃ chaḍḍetvā ekekasmiṃ vipākacittepi kiriyācittepi tisso tissova

Pāli pana mukhamattameva dassetvā saṅkhittā, sā heṭṭhā āgatavitthāravaseneva veditabbā.

Kasmā pana yathā kusalākusalavāresu "tesaṃ vipāke ñāṇaṃ atthapaṭisambhidā"ti vuttaṃ, evamidha "yesaṃ dhammānaṃ ime vipākā, tesu ñāṇaṃ dhammapaṭisambhidā"ti evaṃ na vuttanti? heṭṭhā vuttattā. Yadevaṃ tesaṃ vipāke ñāṇaṃ atthapaṭisambhidāti heṭṭhā vuttattā ayaṃ atthapaṭisambhidāpi idha na vattabbā siyāti. No na vattabbā. Kasmā? heṭṭhā vipākakiriyācittuppādavasena avuttattā. Kiriyāvāre ca yesaṃ dhammānaṃ ime kiriyāti vacanameva na yujjatīti dvīsupi imesu vāresu tisso tissova paṭisambhidā vibhattā.