Chaṭṭhabalaniddesavaṇṇanā.

Sattamabalaniddesa

[828] Sattamabalaniddese jhāyatīti jhāyī. Cattāro jhāyīti jhāyino cattāro janā vuccanti. Tattha paṭhamacatukke tāva paṭhamo samāpattilābhī samānoyeva na lābhimhīti, kammaṭṭhānaṃ samānaṃyeva na kammaṭṭhānanti saññī hoti, ayaṃ appaguṇajjhānalābhīti veditabbo. Dutiyo samāpattiyā alābhīyeva lābhimhīti, Akammaṭṭhānaṃ samānaṃyeva kammaṭṭhānanti saññī hoti, ayaṃ niddājhāyī nāma. Niddāyitvā paṭibuddho evaṃ maññati. Tatiyo samāpattilābhī samāno samāpattilābhimhīti, kammaṭṭhānameva samānaṃ kammaṭṭhānanti saññī hoti, ayaṃ paguṇajjhānalābhīti veditabbo. Catuttho alābhīyeva alābhimhīti, akammaṭṭhānaṃyeva akammaṭṭhānanti saññī hoti, evamettha dve janā ajjhāyinova jhāyīnaṃ anto paviṭṭhattā jhāyīti vuttā.

Dutiyacatukke sasaṅkhārena sappayogena samādhipāribandhikadhamme vikkhambhento dandhaṃ samāpajjati nāma, ekadvicittavāre ṭhatvā sahasā vuṭṭhahanto khippaṃ vuṭṭhāti nāma. Sukheneva pana samādhipāribandhikadhamme sodhento khīppaṃ samāpajjati nāma, yathāparicchedena avuṭṭhahitvā kālaṃ atināmetvā vuṭṭhahanto dandhaṃ vuṭṭhāti nāma. Itare dvepi imināva nayena veditabbā. Ime cattāropi janā samāpattilābhinova.