๑๑. สังคหิเตนสัมปยุตตวิปปยุตตปทนิทเทส

๑๑. เอกาทสมนย สงฺคหิเตนสมฺปยุตฺตวิปฺปยุตฺตปทวณฺณนา

อิทานิ สงฺคหิเตนสมฺปยุตฺตวิปฺปยุตฺตปทํ ภาเชตุํ สมุทยสจฺเจนาติอาทิ อารทฺธํ. ตตฺถ เย สงฺคหิเตนสงฺคหิตปทนิทฺเทเส สมุทยสจฺจาทโยว ธมฺมา อุทฺธฏา, สพฺพปุจฺฉาสุ เตเยว อุทฺธฏา. สทิสวิสฺสชฺชนานมฺปน เอกโต คหิตตฺตา ปทานิ อญฺญาย ปฏิปาฏิยา อาคตานิ. ตตฺถ เย ธมฺมา ปุจฺฉาย อุทฺธฏปเทน ขนฺธาทิสงฺคเหน สงฺคหิตา, เตสํ เยหิ สมฺปโยโค วา วิปฺปโยโค วา โหติ, เตสํ วเสน ขนฺธาทิวิภาโค เวทิตพฺโพ.

ตตฺรายํ นโย:- สมุทยสจฺเจน ตาว สงฺขารกฺขนฺธปริยาปนฺนา ธมฺมา ขนฺธาทิสงฺคเหน สงฺคหิตา, เต จ เสเสหิ ตีหิ ขนฺเธหิ เอเกน มนายตเนน สตฺตหิ วิญฺญาณธาตูหิ สงฺขารกฺขนฺเธ ธมฺมายตนธมฺมธาตูสุ จ ฐเปตฺวา ตณฺหํ เสเสหิ สมฺปยุตฺตตฺตา เกหิจิ สมฺปยุตฺตา นาม. เอเกน ปน รูปกฺขนฺเธน ทสหิ รูปายตเนหิ รูปธาตูหิ จ วิปฺปยุตฺตา, เอกสฺมึ ธมฺมายตเน ธมฺมธาตุยา จ รูปนิพฺพาเนหิ วิปฺปยุตฺตตฺตา เกหิจิ วิปฺปยุตฺตา นาม. อิมินา นเยน ๑- สพฺพตฺถ อตฺโถ เวทิตพฺโพติ.

สงฺคหิเตนสมฺปยุตฺตวิปฺปยุตฺตปทวณฺณนา นิฏฺฐิตา.