"dve saccā paṇṇarasindriyā ekādasa paṭiccapadā

uddhaṃ pana ekādasa gocchakapadamettha tiṃsavidhā"ti.

Pañhā panettha dveyeva honti. Tattha yaṃ pucchāya uddhaṭaṃ padaṃ, tadeva yehi dhammehi khandhādivasena saṅgahitaṃ, te dhamme sandhāya sabbattha ekena khandhenātiādi vuttaṃ. Tatrāyaṃ nayo:- samudayasaccena hi taṇhāvajjā sesasaṅkhārā khandhādisaṅgahena saṅgahitā. Puna tehi taṇhāva saṅgahitā, sā taṇhā puna saṅkhāreheva khandhādisaṅgahena saṅgahitāti. Eseva nayo sabbattha. Arūpadhammapucchāsu panettha saṅkhārakkhandho vā vedanākkhandho vā eko khandho nāma, rūpadhammapucchāsu eko rūpakkhandho. Paridevapucchāya saddāyatanaṃ ekaṃ āyatanaṃ nāma, saddadhātuyeva ekā dhātu nāma, sesaṭṭhānesu dhammāyatanadhammadhātuvasena attho veditabboti.

Saṅgahitenasaṅgahitapadavaṇṇanā niṭṭhitā.