รูปธาตุกถา

๕. รูปธาตุกถาวณฺณนา

[๕๑๕-๕๑๖] อิทานิ รูปธาตุกถา นาม โหติ. ตตฺถ "รูปิโนว ๒- ธมฺมา รูปธาตุ นามา"ติ เยสํ ลทฺธิ เสยฺยถาปิ อนฺธกานํ, เต สนฺธาย รูปิโนติ ปุจฺฉา สกวาทิสฺส, ปฏิญฺญา อิตรสฺส. อถ นํ สกวาที ยสฺมา รูปธาตุ นาม รูปภโว, น รูปมตฺตเมว, ตสฺมา เตนตฺเถน โจเทตุํ รูปธาตูติอาทิมาห. ตํ สพฺพํ กามคุณกถายํ วุตฺตนเยเนว เวทิตพฺพํ. สาว กามธาตูติ ปุฏฺโฐ ภูมิปริจฺเฉทวิโรธํ สมฺปสฺสมาโน ปฏิกฺขิปติ. ปุน ทฬฺหํ กตฺวา ปุฏฺโฐ อตฺตโน ลทฺธิวเสน ปฏิชานาติ. เอวํ สนฺเต ปน ทฺวีหิ ภเวหิ สมนฺนาคตตา อาปชฺชติ, เตน ตํ สกวาที กามภเวน จาติอาทิมาห. อิตโร เอกสฺส ทฺวีหิ ภเวหิ ๓- สมนฺนาคตาภาวโต ปฏิกฺขิปตีติ.

รูปธาตุกถาวณฺณนา นิฏฺฐิตา.

@เชิงอรรถ: ๑ ฉ.ม. กามภาวํ ๒ ฉ.ม. ว-สทฺโท น ทิสฺสติ ๓ ฉ.ม. อยํ ปาโฐ น ทิสฺสติ