กัมมกถา

๒. กมฺมกถาวณฺณนา

[๖๓๓-๖๓๕] อิทานิ กมฺมกถา นาม โหติ. ตตฺถ "นาหํ ภิกฺขเว สญฺเจตนิกานํ กมฺมานนฺ"ติ ๑- สุตฺตปทํ นิสฺสาย "สพฺพํ กมฺมํ สวิปากนฺ"ติ เยสํ ลทฺธิ เสยฺยถาปิ มหาสํฆิกานํ, เตสํ "เจตนาหํ ภิกฺขเว กมฺมํ วทามี"ติ ๒- สตฺถารา อวิเสเสน เจตนา "กมฺมนฺ"ติ วุตฺตา, สาปิ ๓- กุสลากุสลาว สวิปากา, อพฺยากตา อวิปากาติ อิมํ วิภาคํ ทสฺเสตุํ สพฺพํ กมฺมนฺติ ปุจฺฉา สกวาทิสฺส, ปฏิญฺญา อิตรสฺส. ปุน สพฺพา เจตนาติ ปเญฺหสุ อพฺยากตํ สนฺธาย ปฏิกฺเขโป, กุสลากุสเล สนฺธาย ปฏิญฺญา เวทิตพฺพา. วิปากาพฺยากตาติอาทิ สวิปากาวิปากเจตนํ สรูเปน ทสฺเสตุํ วุตฺตํ. เสสเมตฺถ อุตฺตานตฺถเมว. "นาหํ ภิกฺขเว"ติ สุตฺตํ สติ ปจฺจเย ทิฏฺฐธมฺมาทีสุ วิปากปฏิสํเวทนํ สนฺธาย วุตฺตํ, ตสฺมา อสาธกนฺติ.

กมฺมกถาวณฺณนา นิฏฺฐิตา.

@เชิงอรรถ: ๑ องฺ.ทสก. ๒๔/๒๑๗/๒๔๑ ๒ องฺ.ฉกฺก. ๒๒/๓๓๔/๔๖๔ (สฺยา) ๓ ฉ.ม. สา จ