รูปังสเหตุกันติกถา

Rūpaṃ sahetukanti . āmantā . alobhahetunāti . Na hevaṃ vattabbe .pe. adosahetunāti .pe. amohahetunāti .pe. lobhahetunāti .pe. dosahetunāti .pe. mohahetunāti . Na hevaṃ vattabbe .pe.

Rūpaṃ sahetukanti . āmantā . sārammaṇaṃ atthi tassa āvajjanā .pe. paṇidhīti . na hevaṃ vattabbe .pe. Nanu anārammaṇaṃ natthi tassa āvajjanā .pe. paṇidhīti . Āmantā . hañci anārammaṇaṃ natthi tassa āvajjanā .pe. Paṇidhi no vata re vattabbe rūpaṃ sahetukanti.

Alobho sahetuko sārammaṇo atthi tassa āvajjanā .pe. paṇidhīti . āmantā . rūpaṃ sahetukaṃ sārammaṇaṃ atthi tassa āvajjanā .pe. paṇidhīti . na hevaṃ vattabbe .pe. Adoso sahetuko .pe. amoho saddhā viriyaṃ sati samādhi paññā lobho doso moho māno diṭṭhi vicikicchā thīnaṃ uddhaccaṃ ahirikaṃ anottappaṃ sahetukaṃ sārammaṇaṃ atthi tassa āvajjanā .pe. Paṇidhīti . āmantā . rūpaṃ sahetukaṃ sārammaṇaṃ atthi tassa āvajjanā .pe. Paṇidhīti. Na hevaṃ vattabbe .pe.

Rūpaṃ sahetukaṃ anārammaṇaṃ natthi tassa āvajjanā .pe. paṇidhīti . āmantā . alobho sahetuko anārammaṇo natthi tassa āvajjanā .pe. paṇidhīti . na hevaṃ vattabbe .pe. rūpaṃ sahetukaṃ anārammaṇaṃ natthi tassa āvajjanā .pe. paṇidhīti . Āmantā . adoso sahetuko .pe. anottappaṃ sahetukaṃ anārammaṇaṃ natthi tassa āvajjanā .pe. Paṇidhīti. Na hevaṃ vattabbe .pe.

Na vattabbaṃ rūpaṃ sahetukanti . āmantā . nanu rūpaṃ Sappaccayanti . āmantā . hañci rūpaṃ sappaccayaṃ tena vata re vattabbe rūpaṃ sahetukanti. Rūpaṃsahetukantikathā. ---------------