อัตถิ อรหโต ปุญญูปจโยติกถา

๑๗. สตฺตรสมวคฺค

๑. อตฺถิอรหโตปุญฺญูปจโยติกถาวณฺณนา

[๗๗๖-๗๗๙] อิทานิ อตฺถิ อรหโต ปุญฺญูปจโยติกถา นาม โหติ. ตตฺถ เยสํ อรหโต ทานสํวิภาคเจติยวนฺทนาทีนิ กมฺมานิ นิสฺสาย ๑- อตฺถิ อรหโต ปุญฺญูปจโยติ ลทฺธิ เสยฺยถาปิ อนฺธกานํ, เต สนฺธาย ปุจฺฉา สกวาทิสฺส, ปฏิญฺญา อิตรสฺส. อถ นํ "อรหา นาม ปหีนปุญฺญปาโป, โส ยทิ ปุญฺญํ กเรยฺย, ปาปมฺปิ กเรยฺยา"ติ โจเทตุํ อปุญฺญูปจโยติ อาห. อิตโร ปาณาติปาตาทิกิริยํ อปสฺสนฺโต ปฏิกฺขิปติ. ปุญฺญาภิสงฺขารนฺติอาทีสุ ภวคามิกมฺมํ อรหโต นตฺถีติ ปฏิกฺขิปติ. ทานํ ทเทยฺยาติอาทีสุ กิริยาจิตฺเตน ทานาทิปวตฺติสพฺภาวโต สกวาที ปฏิชานาติ. อิตโร จิตฺตํ อนาทิยิตฺวา กิริยาปวตฺติมตฺตทสฺสเนเนว ลทฺธึ ปติฏฺฐเปติ. สา ปน อโยนิโส ปติฏฺฐาปิตตฺตา อปฺปติฏฺฐาปิตา โหตีติ.

อตฺถิอรหโตปุญฺญูปจโยติกถาวณฺณนา นิฏฺฐิตา.