ฐเปตวา อริยมัคคันติกถา

[๑๗๐๕] ฐเปตฺวา อริยมคฺคํ อวเสสา สงฺขารา ทุกฺขาติ ฯ อามนฺตา ฯ ทุกฺขสมุทโยปิ ทุกฺโขติ ฯ น เหวํ วตฺตพฺเพ ฯเปฯ ทุกฺขสมุทโยปิ ทุกฺโขติ ฯ อามนฺตา ฯ ตีเณว อริยสจฺจานีติ ฯ น เหวํ วตฺตพฺเพ ฯเปฯ ตีเณว อริยสจฺจานีติ ฯ อามนฺตา ฯ นนุ จตฺตาริ อริยสจฺจานิ วุตฺตานิ ภควตา ทุกฺขํ ทุกฺขสมุทโย ทุกฺขนิโรโธ ทุกฺขนิโรธคามินี ปฏิปทาติ ฯ อามนฺตา ฯ หญฺจิ จตฺตาริ อริยสจฺจานิ วุตฺตานิ ภควตา ทุกฺขํ ทุกฺขสมุทโย ทุกฺขนิโรโธ ทุกฺขนิโรธคามินี ปฏิปทา โน วต เร วตฺตพฺเพ ตีเณว อริยสจฺจานีติ ฯ

[๑๗๐๖] ทุกฺขสมุทโยปิ ทุกฺโขติ ฯ อามนฺตา ฯ เกนฏฺเฐนาติ ฯ อนิจฺจฏฺเฐนาติ ฯ อริยมคฺโค อนิจฺโจติ ฯ อามนฺตา ฯ อริยมคฺโค ทุกฺโขติ ฯ น เหวํ วตฺตพฺเพ ฯเปฯ อริยมคฺโค อนิจฺโจ โส จ น ทุกฺโขติ ฯ อามนฺตา ฯ ทุกฺขสมุทโย อนิจฺโจ โส จ น ทุกฺโขติ ฯ น เหวํ วตฺตพฺเพ ฯเปฯ ทุกฺขสมุทโย อนิจฺโจ โส จ ทุกฺโขติ ฯ อามนฺตา ฯ อริยมคฺโค อนิจฺโจ โส จ ทุกฺโขติ ฯ น เหวํ วตฺตพฺเพ ฯเปฯ

[๑๗๐๗] น วตฺตพฺพํ ฐเปตฺวา อริยมคฺคํ อวเสสา สงฺขารา ทุกฺขาติ ฯ อามนฺตา ฯ นนุ สา ทุกฺขนิโรธคามินี ปฏิปทาติ ฯ อามนฺตา ฯ หญฺจิ สา ทุกฺขนิโรธคามินี ปฏิปทา เตน วต เร วตฺตพฺเพ ฐเปตฺวา อริยมคฺคํ อวเสสา สงฺขารา ทุกฺขาติ ฯ ฐเปตฺวา อริยมคฺคนฺติกถา ฯ ____________________ น วตฺตพฺพํ สงฺโฆ ทกฺขิณํ ปฏิคฺคณฺหาตีติกถา