นวัตตัพพัง สังโฆ ทักขิณัง วิโสเธตีติกถา

[๑๗๑๓] น วตฺตพฺพํ สงฺโฆ ทกฺขิณํ วิโสเธตีติ ฯ อามนฺตา ฯ นนุ สงฺโฆ อาหุเนยฺโย ปาหุเนยฺโย ทกฺขิเณยฺโย อญฺชลีกรณีโย อนุตฺตรํ ปุญฺญกฺเขตฺตํ โลกสฺสาติ ฯ อามนฺตา ฯ หญฺจิ สงฺโฆ อาหุเนยฺโย ฯเปฯ อนุตฺตรํ ปุญฺญกฺเขตฺตํ โลกสฺส เตน วต เร วตฺตพฺเพ สงฺโฆ ทกฺขิณํ วิโสเธตีติ ฯ

[๑๗๑๔] น วตฺตพฺพํ สงฺโฆ ทกฺขิณํ วิโสเธตีติ ฯ อามนฺตา ฯ นนุ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตาติ ฯ อามนฺตา ฯ หญฺจิ จตฺตาโร ปุริสยุคา อฏฺฐ ปุริสปุคฺคลา ทกฺขิเณยฺยา วุตฺตา ภควตา เตน วต เร วตฺตพฺเพ สงฺโฆ ทกฺขิณํ วิโสเธตีติ ฯ

[๑๗๑๕] น วตฺตพฺพํ สงฺโฆ ทกฺขิณํ วิโสเธตีติ ฯ อามนฺตา ฯ นนุ อตฺถิ เกจิ สงฺฆสฺส ทานํ ทตฺวา ทกฺขิณํ อาราเธนฺตีติ ฯ อามนฺตา ฯ หญฺจิ อตฺถิ เกจิ สงฺฆสฺส ทานํ ทตฺวา ทกฺขิณํ อาราเธนฺติ เตน วต เร วตฺตพฺเพ สงฺโฆ ทกฺขิณํ วิโสเธตีติ ฯ

[๑๗๑๖] นนุ อตฺถิ เกจิ สงฺฆสฺส จีวรํ ทตฺวา ฯเปฯ ปิณฺฑปาตํ ทตฺวา ฯเปฯ เสนาสนํ ทตฺวา คิลานปจฺจยเภสชฺชปริกฺขารํ ทตฺวา ขาทนียํ ทตฺวา โภชนียํ ทตฺวา ฯเปฯ ปานียํ ทตฺวา ทกฺขิณํ อาราเธนฺตีติ ฯ อามนฺตา ฯ หญฺจิ อตฺถิ เกจิ สงฺฆสฺส ปานียํ ทตฺวา ทกฺขิณํ อาราเธนฺติ เตน วต เร วตฺตพฺเพ สงฺโฆ ทกฺขิณํ วิโสเธตีติ ฯ

[๑๗๑๗] สงฺโฆ ทกฺขิณํ วิโสเธตีติ ฯ อามนฺตา ฯ มคฺโค วิโสเธติ ผลํ วิโสเธตีติ ฯ น เหวํ วตฺตพฺเพ ฯเปฯ น วตฺตพฺพํ สงฺโฆ ทกฺขิณํ วิโสเธตีติกถา ฯ __________________ น วตฺตพฺพํ สงฺโฆ ภุญฺชตีติกถา