นวัตตัพพัง พุทธัสส ทินนัง มหัปผลันติกถา

Na vattabbaṃ buddhassa dinnaṃ mahapphalanti . āmantā. Nanu bhagavā dipadānaṃ aggo dipadānaṃ seṭṭho dipadānaṃ pamokkho dipadānaṃ uttamo dipadānaṃ pavaro asamo asamasamo appaṭisamo appaṭibhāgo appaṭipuggaloti . āmantā . hañci bhagavā dipadānaṃ aggo dipadānaṃ seṭṭho dipadānaṃ pamokkho dipadānaṃ uttamo dipadānaṃ pavaro asamo asamasamo appaṭisamo appaṭibhāgo appaṭipuggalo tena vata re vattabbe buddhassa dinnaṃ mahapphalanti.

Na vattabbaṃ buddhassa dinnaṃ mahapphalanti . āmantā. Atthi koci buddhena samasamo sīlena samādhinā paññāyāti . Natthi . hañci natthi koci buddhena samasamo sīlena samādhinā paññāya tena vata re vattabbe buddhassa dinnaṃ mahapphalanti.

Na vattabbaṃ buddhassa dinnaṃ mahapphalanti . āmantā. Nanu vuttaṃ bhagavatā na yimasmiṃ vā lokasmiṃ parasmiṃ vā pana buddhena seṭṭho ca samo ca vijjati yamāhuneyyānaṃ aggataṃ gato puññatthikānaṃ vipulaphalesinanti attheva suttantoti. Āmantā. Tena hi buddhassa dinnaṃ mahapphalanti. Na vattabbaṃ buddhassa dinnaṃ mahapphalantikathā. --------------