ฌานสังกันติกถา

Jhānā jhānaṃ saṅkamatīti . āmantā . paṭhamā jhānā tatiyaṃ jhānaṃ saṅkamatīti . na hevaṃ vattabbe .pe. jhānā jhānaṃ saṅkamatīti . āmantā . dutiyā jhānā catutthaṃ jhānaṃ saṅkamatīti . Na hevaṃ vattabbe .pe.

Paṭhamā jhānā dutiyaṃ jhānaṃ saṅkamatīti . āmantā . Yā paṭhamassa jhānassa uppādāya āvajjanā .pe. paṇidhi sāva dutiyassa jhānassa uppādāya āvajjanā .pe. paṇidhīti . na hevaṃ vattabbe .pe. paṭhamā jhānā dutiyaṃ jhānaṃ saṅkamatīti . na Vattabbaṃ yā paṭhamassa jhānassa uppādāya āvajjanā .pe. paṇidhi sāva dutiyassa jhānassa uppādāya āvajjanā .pe. paṇidhīti . Āmantā . dutiyaṃ jhānaṃ anāvajjantassa uppajjati .pe. Apaṇidahantassa uppajjatīti . na hevaṃ vattabbe .pe. nanu dutiyaṃ jhānaṃ āvajjantassa uppajjati .pe. paṇidahantassa uppajjatīti . Āmantā. {1751.1} Hañci dutiyaṃ jhānaṃ āvajjantassa uppajjati .pe. Paṇidahantassa uppajjati no vata re vattabbe paṭhamā jhānā dutiyaṃ jhānaṃ saṅkamatīti . paṭhamā jhānā dutiyaṃ jhānaṃ saṅkamatīti . Āmantā . paṭhamaṃ jhānaṃ kāme ādīnavato manasikaroto uppajjatīti. Āmantā . dutiyaṃ jhānaṃ kāme ādīnavato manasikaroto uppajjatīti. Na hevaṃ vattabbe .pe. paṭhamaṃ jhānaṃ savitakkaṃ savicāranti . Āmantā . dutiyaṃ jhānaṃ savitakkaṃ savicāranti . na hevaṃ vattabbe .pe. paṭhamā jhānā dutiyaṃ jhānaṃ saṅkamatīti . āmantā . Taññeva paṭhamaṃ jhānaṃ taṃ dutiyaṃ jhānanti. Na hevaṃ vattabbe .pe.

Dutiyā jhānā tatiyaṃ jhānaṃ saṅkamatīti . āmantā . Yā dutiyassa jhānassa uppādāya āvajjanā .pe. paṇidhi sāva tatiyassa jhānassa uppādāya āvajjanā .pe. paṇidhīti . na hevaṃ vattabbe .pe. dutiyā jhānā tatiyaṃ jhānaṃ saṅkamatīti . na vattabbaṃ yā dutiyassa jhānassa uppādāya āvajjanā .pe. paṇidhi sāva tatiyassa jhānassa uppādāya āvajjanā .pe. paṇidhīti . āmantā. Tatiyaṃ jhānaṃ anāvajjantassa uppajjati .pe. apaṇidahantassa uppajjatīti . na hevaṃ vattabbe .pe. nanu tatiyaṃ jhānaṃ āvajjantassa uppajjati .pe. Paṇidahantassa uppajjatīti. Āmantā. {1752.1} Hañci tatiyaṃ jhānaṃ āvajjantassa uppajjati .pe. Paṇidahantassa uppajjati no vata re vattabbe dutiyā jhānā tatiyaṃ jhānaṃ saṅkamatīti . dutiyā jhānā tatiyaṃ jhānaṃ saṅkamatīti . Āmantā . dutiyaṃ jhānaṃ vitakkavicāre ādīnavato manasikaroto uppajjatīti . āmantā . tatiyaṃ jhānaṃ vitakkavicāre ādīnavato manasikaroto uppajjatīti . na hevaṃ vattabbe .pe. dutiyaṃ jhānaṃ sappītikanti . āmantā . tatiyaṃ jhānaṃ sappītikanti . na hevaṃ vattabbe .pe. dutiyā jhānā tatiyaṃ jhānaṃ saṅkamatīti . āmantā. Taññeva dutiyaṃ jhānaṃ taṃ tatiyaṃ jhānanti . na hevaṃ vattabbe .pe.

Tatiyā jhānā catutthaṃ jhānaṃ saṅkamatīti . Āmantā. Yā tatiyassa jhānassa uppādāya āvajjanā .pe. paṇidhi sāva catutthassa jhānassa uppādāya āvajjanā .pe. paṇidhīti . na hevaṃ vattabbe .pe. tatiyā jhānā catutthaṃ jhānaṃ saṅkamatīti . na vattabbaṃ yā tatiyassa jhānassa uppādāya āvajjanā .pe. Paṇidhi sāva catutthassa jhānassa uppādāya āvajjanā .pe. Paṇidhīti . āmantā . catutthaṃ jhānaṃ anāvajjantassa uppajjati .pe. Apaṇidahantassa uppajjatīti . na hevaṃ vattabbe .pe. Nanu catutthaṃ jhānaṃ āvajjantassa uppajjati .pe. paṇidahantassa uppajjatīti. Āmantā. {1753.1} Hañci catutthaṃ jhānaṃ āvajjantassa uppajjati .pe. Paṇidahantassa uppajjati no vata re vattabbe tatiyā jhānā catutthaṃ jhānaṃ saṅkamatīti . tatiyā jhānā catutthaṃ jhānaṃ saṅkamatīti. Āmantā. Tatiyaṃ jhānaṃ pītiṃ ādīnavato manasikaroto uppajjatīti . āmantā . Catutthaṃ jhānaṃ pītiṃ ādīnavato manasikaroto uppajjatīti . na hevaṃ vattabbe .pe. tatiyaṃ jhānaṃ sukhasahagatanti . āmantā . catutthaṃ jhānaṃ sukhasahagatanti . na hevaṃ vattabbe .pe. tatiyā jhānā catutthaṃ jhānaṃ saṅkamatīti . āmantā . taññeva tatiyaṃ jhānaṃ taṃ catutthaṃ jhānanti. Na hevaṃ vattabbe .pe.

Na vattabbaṃ jhānā jhānaṃ saṅkamatīti . āmantā . Nanu vuttaṃ bhagavatā idha bhikkhave bhikkhu vivicceva kāmehi .pe. Catutthaṃ jhānaṃ upasampajja viharatīti attheva suttantoti . Āmantā. Tenahi jhānā jhānaṃ saṅkamatīti. Jhānasaṅkantikathā. --------