กิเลสชหนกถา

Atīte kilese jahatīti . Āmantā. Niruddhaṃ nirodheti vigataṃ vigameti khīṇaṃ khepeti atthaṅgataṃ atthaṅgameti abbhatthaṅgataṃ abbhatthaṅgametīti . na hevaṃ vattabbe .pe. atīte kilese jahatīti. Āmantā . nanu atītaṃ niruddhanti . āmantā . hañci atītaṃ niruddhaṃ no vata re vattabbe atīte kilese jahatīti. Atīte kilese jahatīti. Āmantā . nanu atītaṃ natthīti . āmantā . hañci atītaṃ natthi no vata re vattabbe atīte kilese jahatīti.

Anāgate kilese jahatīti . āmantā . ajātaṃ ajaneti asañjātaṃ asañjaneti anibbattaṃ anibbatteti apātubhūtaṃ apātubhāvetīti . na hevaṃ vattabbe .pe. anāgate kilese jahatīti . āmantā . nanu anāgataṃ ajātanti . āmantā . Hañci anāgataṃ ajātaṃ no vata re vattabbe anāgate kilese Jahatīti . anāgate kilese jahatīti . āmantā . nanu anāgataṃ natthīti . āmantā . hañci anāgataṃ natthi no vata re vattabbe anāgate kilese jahatīti.

Paccuppanne kilese jahatīti . āmantā . ratto rāgaṃ jahati duṭṭho dosaṃ jahati mūḷho mohaṃ jahati kiliṭṭho kilese jahatīti . na hevaṃ vattabbe .pe. rāgena rāgaṃ jahati dosena dosaṃ jahati mohena mohaṃ jahati kilesehi kilese jahatīti . Na hevaṃ vattabbe .pe. rāgo cittasampayutto maggo cittasampayuttoti . Āmantā . dvinnaṃ phassānaṃ .pe. dvinnaṃ cittānaṃ samodhānaṃ hotīti . na hevaṃ vattabbe .pe. rāgo akusalo maggo kusaloti. Āmantā . kusalākusalā sāvajjānavajjā hīnappaṇītā kaṇhasukka- sappaṭibhāgā dhammā sammukhībhāvaṃ āgacchantīti . na hevaṃ vattabbe .pe. kusalākusalā .pe. sappaṭibhāgā dhammā sammukhībhāvaṃ āgacchantīti . āmantā . nanu vuttaṃ bhagavatā cattārīmāni bhikkhave suvidūravidūrāni . katamāni cattāri . nabhañca bhikkhave paṭhavī ca idaṃ paṭhamaṃ suvidūravidūraṃ .pe. tasmā sataṃ dhammo asabbhi ārakāti attheva suttantoti . āmantā . tena hi na vattabbaṃ kusalākusalā .pe. Sammukhībhāvaṃ āgacchantīti.

Na vattabbaṃ atīte kilese jahati anāgate kilese jahati paccuppanne kilese jahatīti . āmantā . natthi kilese Jahatīti . na hevaṃ vattabbe .pe. tena hi atīte kilese jahati anāgate kilese jahati paccuppanne kilese jahatīti. Kilesajahanakathā. ---------