มัคคกถา

๕. มคฺคกถาวณฺณนา

[๘๗๒-๘๗๕] อิทานิ มคฺคกถา นาม โหติ. ตตฺถ เยสํ "ปุพฺเพว โข ปนสฺส กายกมฺมํ วจีกมฺมํ อาชีโว สุปริสุทฺโธ โหตี"ติ ๑- อิทญฺเจว สุตฺตํ

@เชิงอรรถ: ๑ ม.อุ. ๑๔/๔๓๑/๓๗๑ สมฺมาวาจากมฺมนฺตาชีวานญฺจ จิตฺตวิปฺปยุตฺตตํ นิสฺสาย "นิปฺปริยาเยน ปญฺจงฺคิโกว มคฺโค"ติ ลทฺธิ เสยฺยถาปิ มหิสาสกานํ, เต สนฺธาย ปญฺจงฺคิโกติ ปุจฺฉา สกวาทิสฺส, ปฏิญฺญา อิตรสฺส. สมฺมาวาจา มคฺคงฺคํ, สา จ น มคฺโคติอาทิ ปรสมยวเสน วุตฺตํ. ปรสมยสฺมิญฺหิ สมฺมาวาจาทโย มคฺคงฺคนฺติ อาคตา. รูปตฺตา ปน มคฺโค น โหตีติ วณฺณิตา. สมฺมาทิฏฺฐิ มคฺคงฺคนฺติอาทิ มคฺคงฺคสฺส อมคฺคตา นาม นตฺถีติ ทสฺสนตฺถํ วุตฺตํ. ปุพฺเพว โข ปนสฺสาติ สุตฺเต ปริสุทฺธสีลสฺส มคฺคภาวนา นาม โหติ, น อิตรสฺสาติ อาคมนียปฏิปทาย วิสุทฺธิภาวทสฺสนตฺถํ "กายกมฺมํ วจีกมฺมํ อาชีโว สุปริสุทฺโธ โหตี"ติ วุตฺตํ, น อิเมหิ วินา ปญฺจงฺคิกภาว- ทสฺสนตฺถํ. เตเนวาห "เอวมสฺสายํ อริโย อฏฺฐงฺคิโก มคฺโค ภาวนาปาริปูรึ คจฺฉตี"ติ. สกวาทินา อาภตสุตฺตํ นีตตฺถเมวาติ.

มคฺคกถาวณฺณนา นิฏฺฐิตา.