สาสนกถา

๒๑. เอกวีสติมวคฺค

๑. สาสนกถาวณฺณนา

อิทานิ สาสนกถา นาม โหติ. ตตฺถ ติสฺโส สงฺคีติโย สนฺธาย "สาสนํ นวํ กตนฺ"ติ จ "อตฺถิ โกจิ ตถาคตสาสนํ นวํ กโรตี"ติ จ "ลพฺภา ตถาคตสาสนํ นวํ กาตุนฺ"ติ จ เยสํ ลทฺธิ เสยฺยถาปิ เอกจฺจานํ อุตฺตราปถกานํ, เต สนฺธาย ตีสุปิ กถาสุ ปุจฺฉา สกวาทิสฺส, ปฏิญฺญา อิตรสฺส. สติปฏฺฐานาติอาทิ สาสนํ นาม สติปฏฺฐานาทโย เจว อริยธมฺมา กุสลาทีนญฺจ เทสนา. ตตฺถ เยสํ ภควตา เทสิตา สติปฏฺฐานาทโย, ฐเปตฺวา เต อญฺเญสํ วา สติปฏฺฐานาทีนํ กรเณน อกุสลาทีนํ วา กุสลาทิภาวกรเณน สาสนํ นวํ กตํ นาม ภเวยฺย, กินฺตํ เอวํ กตํ เกนจิ, อตฺถิ วา โกจิ เอวํ กโรติ, ลพฺภา วา เอวํ กาตุนฺติ ตีสุปิ ปุจฺฉาสุ โจทนตฺถํ วุตฺตํ. เสสํ สพฺพตฺถ ยถาปาลิเมว นิยฺยาตีติ.

สาสนกถาวณฺณนา นิฏฺฐิตา.