อินฺทฺริยปโรปริยตฺติปเญฺห เอกเทเสน สาธารณตํ สนฺธาย สาวกวิสเย ปฏิชานาติ.

[๓๕๕] อิทานิ ยสฺมา อุทฺเทสโต ฐานาฐานาทีนิ สาวโก ชานาติ, ตสฺมา สาวกสฺส อตฺถชานนํ ๒- ปกาเสตฺวา เตน ชานนมตฺตสามญฺเญน เตสํ สาวกสาธารณตํ ปติฏฺฐาเปตุํ สาวโก ฐานาฐานํ ชานาตีติอาทโย ปรวาทิปญฺหา โหนฺติ. ตตฺถ อินฺทฺริยปโรปริยตฺติญาณํ ฉนฺนํ อสาธารณญาณานํ อญฺญตรนฺติ น คหิตํ. อาสวกฺขเยน วา อาสวกฺขยนฺติ ยํ ตถาคตสฺส อาสวกฺขเยน สทฺธึ สาวกสฺส อาสวกฺขยํ ปฏิจฺจ วตฺตพฺพํ สิยา นานากรณํ, ตํ นตฺถิ. วิมุตฺติยา วา วิมุตฺตีติ ๓- ปเทปิ เอเสว นโย. เสสเมตฺถ อุตฺตานตฺถเมวาติ. ๔-

[๓๕๖] อิทานิ ยํ สกวาทินา "อาสวานํ ขเย ญาณํ สาธารณนฺ"ติ อนุญฺญาตํ, เตน สทฺธึ สํสนฺเทตฺวา เสสานมฺปิ สาธารณภาวํ ปุจฺฉิตุํ ปุน อาสวานํ ขเยติอาทโย ปรวาทิปญฺหาว โหนฺติ. เตสํ วิสฺสชฺชเนน ๕- สกวาทินา อาสวกฺขเย วิเสสาภาเวน ตํ ญาณํ สาธารณนฺติ อนุญฺญาตํ. อิตเรสุปิ วิเสสาภาเวน สาธารณตา ปฏิกฺขิตฺตา. ปุน ฐานาฐานาทีนํ อาสวกฺขเยเนว สทฺธึ สํสนฺเทตฺวา อสาธารณปุจฺฉา ปรวาทิสฺเสว. ตตฺถ อาสวกฺขยญาเณ ปฏิกฺเขโป เสเสสุปิ จ ๖- ปฏิญฺญา สกวาทิสฺส. ตโต อินฺทฺริยปโรปริยตฺเตน สทฺธึ สํสนฺเทตฺวา