[๗๓๓-๗๓๔] น กาลํ กเรยฺยาติ ปุจฺฉา ปรวาทิสฺส. อตฺถิ โส นิยาโมติ ปรวาทิสฺส ปเญฺห ปน ยสฺมา เอวรูโป นิยาโม นาม นตฺถิ, ตสฺมา ปฏิกฺขิปติ. จกฺขุวิญฺญาณสมงฺคีติอาทิ สกวาทินา "นิยาเม อสนฺเตปิ สมเยเนว ๑- มรติ, น อสมเยนา"ติ ทสฺเสตุํ วุตฺตํ. ตตฺรายมธิปฺปาโย:- ยทิ นิยามาภาเวน กาลกิริยา ภเวยฺย, จกฺขุวิญฺญาณสมงฺคิโนปิ ภเวยฺย, ตโต "ปญฺจหิ วิญฺญาเณหิ น จวติ น อุปปชฺชตี"ติ สุตฺตวิโรโธ สิยา. ยถา ปน จกฺขุวิญฺญาณสมงฺคิสฺส กาลกิริยา น โหติ, ตถา นิโรธสมาปนฺนสฺสาปีติ.

ตติยสญฺญาเวทยิตกถาวณฺณนา นิฏฺฐิตา.