10. Jīvitindriyakathāvaṇṇanā

[540] Idāni jīvitindriyakathā nāma hoti. Tattha yesaṃ jīvitindriyaṃ nāma cittavippayutto arūpī dhammo, tasmā rūpajīvitindriyaṃ natthīti laddhi seyyathāpi pubbaseliyānañceva samitiyānañca, te sandhāya pucchā sakavādissa, paṭiññā itarassa. Natthi rūpīnaṃ dhammānaṃ āyūti pañhe upādinnarūpānampi tiṇakaṭṭhādīnampi santānavasena pavattimeva āyu ṭhiti yapanā yāpanā iriyanā vattanā pālanāti icchati, tasmā paṭikkhipati. Atthīti pañhepi iminā kāraṇena paṭijānāti. Atthi arūpajīvitindriyanti pañhepi arūpadhammānaṃ cittavippayuttaṃ jīvitindriya- santānaṃ nāma atthīti icchati, tasmā paṭijānāti.

[541] Rūpīnaṃ dhammānaṃ āyu arūpajīvitindriyanti pañhe sattasantāne rūpino vā dhammā honti arūpino vā, sabbesaṃ cittavippayuttaṃ arūpajīvitindriyameva icchati, tasmā paṭijānāti.