TIPITAKA Volume 37 : PALI ROMAN Abhidhamma Pitaka Vol 4 : Abhi. Kathāvatthu Phalañāṇakathā

[1075] Sāvakassa phale ñāṇaṃ atthīti . āmantā . Sāvako phalassakataṃ paññāpetīti . na hevaṃ vattabbe .pe. sāvakassa phale ñāṇaṃ atthīti . āmantā . atthi sāvakassa phalaparopariyattaṃ 1- @Footnote: 1 Ma. phalaparopariyatti. (īdisoyeva parato padesu ikārantāgamo.) Indriyaparopariyattaṃ puggalaparopariyattanti . na hevaṃ vattabbe .pe. sāvakassa phale ñāṇaṃ atthīti . āmantā . atthi sāvakassa khandhapaññatti āyatanapaññatti dhātupaññatti saccapaññatti indriyapaññatti puggalapaññattīti . na hevaṃ vattabbe .pe. Sāvakassa phale ñāṇaṃ atthīti . āmantā . sāvako jino satthā sammāsambuddho sabbaññū sabbadassāvī dhammasāmī dhammapaṭisaraṇoti . Na hevaṃ vattabbe .pe. sāvakassa phale ñāṇaṃ atthīti. Āmantā. Sāvako anuppannassa maggassa uppādetā asañjātassa maggassa sañjanetā anakkhātassa maggassa akkhātā maggaññū maggavidū maggakovidoti. Na hevaṃ vattabbe .pe.