ปวารณากฺขนฺธกวณฺณนา

{๒๐๙} ปวารณากฺขนฺธเก เนว อาลเปยฺยาม น สลฺลเปยฺยามาติ เอตฺถ อาลาโป นาม ปฐมวจนํ สลฺลาโป นาม ปจฺฉิมวจนํ ฯ หตฺถวิลงฺฆเกนาติ หตฺถุกฺเขปเกน ฯ ปสุสํวาสนฺติ ปสูนํ วิย สํวาสํ ฯ ปสโวปิ หิ อตฺตโน อุปฺปนฺนํ สุขทุกฺขํ อญฺญมญฺญสฺส น อาโรเจนฺติ ปฏิสนฺถารํ น กโรนฺติ ตถา เอเตปิ อกํสุ ฯ ตสฺมา เนสํ สํวาโส ปสุสํวาโสติ วุจฺจติ ฯ เอส นโย สพฺพตฺถ ฯ น ภิกฺขเว มูควตฺตํ ติตฺถิยสมาทานนฺติ อิมํ เตมาสํ น กเถตพฺพนฺติ เอวรูปํ วตฺตสมาทานํ น กาตพฺพํ ฯ อธมฺมิกกติกา หิ เอสา ฯ อญฺญมญฺญานุโลมตาติ อญฺญมญฺญํ วตฺตุํ อนุโลมภาโว ฯ วทนฺตุ มํ อายสฺมนฺโตติ หิ วทนฺตํ สกฺกา โหติ กิญฺจิ วตฺตุํ น อิตรํ ฯ อาปตฺติวุฏฺฐานตา วินยปุเรกฺขารตาติ อาปตฺตีหิ วุฏฺฐานภาโว วินยํ ปุรโต กตฺวา จรณภาโว ฯ วทนฺตุ มํ อายสฺมนฺโตติ หิ วทนฺโต อาปตฺตีหิ วุฏฺฐหิสฺสติ วินยญฺจ ปุรกฺขิตฺวา วิหรตีติ วุจฺจติ ฯ {๒๑๐} สุณาตุ เม ภนฺเต สงฺโฆ อชฺช ปวารณา ยทิ สงฺฆสฺส ปตฺตกลฺลํ สงฺโฆ ปวาเรยฺยาติ อยํ สพฺพสงฺคาหิกา นาม ญตฺติ ฯ เอวํ หิ วุตฺเต เตวาจิกํ เทฺววาจิกญฺจ เอกวาจิกญฺจ ปวาเรตุํ วฏฺฏติ สมานวสฺสิกเมว น วฏฺฏติ ฯ เตวาจิกํ ปวาเรยฺยาติ วุตฺเต ปน เตวาจิกเมว วฏฺฏติ อญฺญํ น วฏฺฏติ ฯ เทฺววาจิกํ ปวาเรยฺยาติ วุตฺเต เทฺววาจิกญฺจ เตวาจิกญฺจ วฏฺฏติ เอกวาจิกญฺจ สมานวสฺสิกญฺจ น วฏฺฏติ ฯ เอกวาจิกํ ปวาเรยฺยาติ วุตฺเต ปน เอกวาจิกเทฺววาจิกเตวาจิกานิ วฏฺฏนฺติ สมานวสฺสิกเมว น วฏฺฏติ ฯ สมานวสฺสิกนฺติ วุตฺเต สพฺพํ วฏฺฏติ ฯ {๒๑๑} อจฺฉนฺตีติ นิสินฺนาว โหนฺติ น อุฏฺฐหนฺติ ฯ ตทนนฺตราติ ตทนนฺตรํ ตาวตฺตกํ กาลนฺติ อตฺโถ ฯ {๒๑๒} จาตุทฺทสิกา จ ปณฺณรสิกา จาติ เอตฺถ จาตุทฺทสิกาย อชฺช ปวารณา จาตุทฺทสีติ เอวํ ปุพฺพกิจฺจํ กาตพฺพํ ปณฺณรสิกาย อชฺช ปวารณา ปณฺณรสีติ ฯ

ปวารณากมฺเมสุ สเจ เอกสฺมึ วิหาเร ปญฺจสุ ภิกฺขูสุ วสนฺเตสุ เอกสฺส ปวารณํ อาหริตฺวา จตฺตาโร คณญตฺตึ ฐเปตฺวา ปวาเรนฺติ จตูสุ วา ตีสุ วา วสนฺเตสุ เอกสฺส ปวารณํ อาหริตฺวา ตโย วา เทฺว วา สงฺฆญตฺตึ ฐเปตฺวา ปวาเรนฺติ สพฺพเมตํ อธมฺเมน วคฺคํ ปวารณากมฺมํ ฯ สเจ ปน สพฺเพปิ ปญฺจ ชนา เอกโต สนฺนิปติตฺวา คณญตฺตึ ฐเปตฺวา ปวาเรนฺติ จตฺตาโร วา ตโย วา เทฺว วา วสนฺตา เอกโต สนฺนิปติตฺวา สงฺฆญตฺตึ ฐเปตฺวา ปวาเรนฺติ สพฺพเมตํ อธมฺเมน สมคฺคํ ปวารณากมฺมํ ฯ