สเจ ปญฺจสุ ชเนสุ เอกสฺส ปวารณํ อาหริตฺวา จตฺตาโร สงฺฆญตฺตึ ฐเปตฺวา ปวาเรนฺติ จตูสุ วา ตีสุ วา เอกสฺส ปวารณํ อาหริตฺวา ตโย วา เทฺว วา คณญตฺตึ ฐเปตฺวา ปวาเรนฺติ สพฺพเมตํ ธมฺเมน วคฺคํ ปวารณากมฺมํ ฯ สเจ ปน สพฺเพปิ ปญฺจ ชนา เอกโต สนฺนิปติตฺวา สงฺฆญตฺตึ ฐเปตฺวา ปวาเรนฺติ จตฺตาโร วา ตโย วา เอกโต สนฺนิปติตฺวา คณญตฺตึ ฐเปตฺวา ปวาเรนฺติ เทฺว อญฺญมญฺญํ ปวาเรนฺติ เอโก วสนฺโต อธิฏฺฐานปวารณํ กโรติ สพฺพเมตํ ธมฺเมน สมคฺคํ ปวารณากมฺมนฺติ ฯ

{๒๑๓} ทินฺนา โหติ ปวารณาติ เอตฺถ เอวํ ทินฺนาย ปวารณาย ปวารณาหารเกน สงฺฆํ อุปสงฺกมิตฺวา เอวํ ปวาเรตพฺพํ ติสฺโส ภนฺเต ภิกฺขุ สงฺฆํ ปวาเรติ ทิฏฺเฐน วา สุเตน วา ปริสงฺกาย วา วทตุ ตํ ภนฺเต สงฺโฆ อนุกมฺปํ อุปาทาย ปสฺสนฺโต ปฏิกริสฺสติ ฯ ทุติยมฺปิ ภนฺเต... ตติยมฺปิ ภนฺเต ติสฺโส ภิกฺขุ สงฺฆํ ปวาเรติ ทิฏฺเฐน วา สุเตน วา ปริสงฺกาย วา ฯเปฯ ปฏิกริสฺสตีติ ฯ สเจ ปน วุฑฺฒตโร โหติ อายสฺมา ภนฺเต ติสฺโสติ วตฺตพฺพํ ฯ เอวญฺหิ เตน ตสฺสตฺถาย ปวาริตํ โหตีติ ฯ

ปวารณํ เทนฺเตน ฉนฺทํปิ ทาตุนฺติ เอตฺถ ฉนฺททานํ อุโปสถกฺขนฺธเก วุตฺตนเยเนว เวทิตพฺพํ ฯ อิธาปิ จ ฉนฺททานํ อวเสสสงฺฆกมฺมตฺถาย ตสฺมา สเจ ปวารณํ เทนฺโต ฉนฺทํ เทติ วุตฺตนเยเนว อาหฏาย ปวารณาย อาโรจิตาย เตน จ ภิกฺขุนา สงฺเฆน จ ปริวาริตเมว โหติ ฯ อถ ปวารณเมว เทติ น ฉนฺทํ ตสฺส จ ปวารณาย อาโรจิตาย สงฺเฆน จ ปวาริเต สพฺเพสํ สุปฺปวาริตํ โหติ อญฺญมฺปน กมฺมํ กุปฺปติ ฯ สเจ ปน ฉนฺทเมว เทติ น ปวารณํ สงฺฆสฺส ปวารณา จ เสสกมฺมานิ จ น กุปฺปนฺติ เตน ปน ภิกฺขุนา อปฺปวาริตํ โหติ ฯ ปวารณาทิวเส ปน พหิสีมาย ปวารณํ อธิฏฺฐหิตฺวา อาคเตนปิ ฉนฺโท ทาตพฺโพ เตน สงฺฆสฺส ปวารณากมฺมํ น กุปฺปติ ฯ

{๒๑๘} อชฺช เม ปวารณาติ เอตฺถ สเจ จาตุทฺทสิกา โหติ อชฺช เม ปวารณา จาตุทฺทสี สเจ ปณฺณรสิกา อชฺช เม ปวารณา ปณฺณรสีติ เอวํ อธิฏฺฐาตพฺพํ ฯ {๒๑๙} ตทหุปวารณาย อาปตฺตินฺติ- อาทิ วุตฺตนยเมว ฯ {๒๒๒} ปุน ปวาเรตพฺพนฺติ ปุน ปุพฺพกิจฺจํ กตฺวา ญตฺตึ ฐเปตฺวา สงฺฆตฺเถรโต ปฏฺฐาย ปวาเรตพฺพํ ฯ เสสํ อุโปสถกฺขนฺธกวณฺณนายํ วุตฺตนเยเนว เวทิตพฺพํ ฯ