{๒๔๐} เทฺว ตโย อุโปสเถ จาตุทฺทสิเก กาตุนฺติ เอตฺถ จตุตฺถปญฺจมา เทฺว จาตุทฺทสิกา ตติโย ปน ปกติยาปิ จาตุทฺทสิโกเยวาติ ตสฺมา ตติยจตุตฺถา วา ตติยจตุตฺถปญฺจมา วา เทฺว ตโย จาตุทฺทสิกา กาตพฺพา ฯ อถ จตุตฺเถ กเต เต สุณนฺติ ปญฺจโม จาตุทฺทสิโก กาตพฺโพ ฯ เอวมฺปิ เทฺว จาตุทฺทสิกา โหนฺติ ฯ เอวํ กโรนฺตา ภณฺฑนการกานํ เตรเส วา จาตุทฺทเส วา อิเม ปณฺณรสีปวารณํ ปวาเรสฺสนฺติ ฯ เอวํ ปวาเรนฺเตหิ จ พหิสีมาย สามเณเร ฐเปตฺวา เต อาคจฺฉนฺตีติ สุตฺวา ลหุํ ลหุํ สนฺนิปติตฺวา ปวาเรตพฺพํ ฯ เอตมตฺถํ ทสฺเสตุํ เต เจ ภิกฺขเว ฯเปฯ ตถา กโรนฺตูติ วุตฺตํ ฯ อสํวิหิตาติ อสํวิทหิตา อาคมนชานนตฺถาย อกตสํวิทหนา อวิญฺญาตาว หุตฺวาติ อตฺโถ ฯ เตสํ วิกฺขิตฺวาติ กิลนฺตตฺถ มุหุตฺตํ วิสฺสมถาติอาทินา นเยน สมฺโมหํ กตฺวาติ อตฺโถ ฯ โน เจ ลเภถาติ โน จ พหิสีมํ คนฺตุํ ลเภยฺยุํ ภณฺฑนการกานํ สามเณเรหิ เจว ทหรภิกฺขูหิ จ นิรนฺตรํ อนุพทฺธาว โหนฺติ ฯ อาคเม ชุณฺเหติ ยํ สนฺธาย อาคเม ชุณฺเห ปวาเรยฺยามาติ ญตฺตึ ฐเปสุํ ตสฺมึ อาคเม ชุณฺเห ฯ โกมุทิยา จาตุมฺมาสินิยา อกามา ปวาเรตพฺพนฺติ อวสฺสํ ปวาเรตพฺพํ น หิ ตํ อติกฺกมิตฺวา ปวาเรตุํ ลพฺภติ ฯ เตหิ เจ ภิกฺขเว ภิกฺขูหิ ปวาริยมาเนติ เอวํ จาตุมฺมาสินิยา ปวาริยมาเน ฯ

{๒๔๑} อญฺญตโร ผาสุวิหาโรติ ตรุณสมโถ วา ตรุณวิปสฺสนา วา ฯ ปริพาหิรา ภวิสฺสามาติ อนิพทฺธรตฺติฏฺฐานทิวาฏฺฐานาทิเภเทน ภาวนานุโยคํ สมฺปาเทตุํ อสกฺโกนฺตา พาหิรา ภวิสฺสาม ฯ สพฺเพเหว เอกชฺฌํ สนฺนิปติตพฺพนฺติ อิมินา ฉนฺททานํ ปฏิกฺขิปติ ฯ ภินฺนสฺส หิ สงฺฆสฺส สมคฺคกรณกาเล ติณวตฺถารกสมเถ อิมสฺมิญฺจ ปวารณ- สงฺคเหติ อิเมสุ ตีสุ ฐาเนสุ ฉนฺทํ ทาตุํ น วฏฺฏติ ฯ ปวารณ- สงฺคโห จ นามายํ วิสฺสฏฺฐกมฺมฏฺฐานานํ ถามคตสมถวิปสฺสนานํ โสตาปนฺนาทีนญฺจ น ทาตพฺโพ ฯ ตรุณสมถวิปสฺสนาลาภิโน ปน สพฺเพ วา โหนฺตุ อุปฑฺฒา วา เอกปุคฺคโล วา เอกสฺสปิ วเสน ทาตพฺโพเยว ฯ ทินฺเน ปวารณสงฺคเห อนฺโตวสฺสํ ปริหาโรว โหติ อาคนฺตุกา เตสํ เสนาสนํ คเหตุํ น ลภนฺติ เตหิปิ ฉินฺนวสฺเสหิ น ภวิตพฺพํ ปวาเรตฺวา ปน อนฺตราปิ จาริกํ ปกฺกมิตุํ ลภนฺตีติ ทสฺสนตฺถํ เตหิ เจ ภิกฺขเวติอาทิมาห ฯ เสสํ สพฺพตฺถ อุตฺตานเมวาติ ฯ