สุทฺโธทนมหาราเชน ปน วนฺทิเต ภควติ อวนฺทิตฺวา ฐิโต นาม เอกสากิโยปิ นาโหสิ สพฺเพเยว วนฺทึสุ ฯ อิติ ภควา ญาตี วนฺทาเปตฺวา อากาสโต โอรุยฺห ปญฺญตฺเต อาสเน นิสีทิ ฯ นิสินฺเน ภควติ สิขาปฺปตฺโต ญาติสมาคโม อโหสิ ฯ สพฺเพ เอกคฺคจิตฺตา สนฺนิสินฺนา นิสีทึสุ ฯ ตโต มหาเมโฆ โปกฺขรวสฺสํ วสฺสิ ฯ ตามฺพวณฺณมุทกํ เหฏฺฐา วิรวนฺตํ คจฺฉติ ฯ กสฺสจิ สรีเร เอกพินฺทุมตฺตมฺปิ น ปตติ ฯ ตํ ทิสฺวา สพฺเพ อจฺฉริยพฺภูตชาตา อเหสุํ ฯ ภควา น อิทาเนว มยฺหํ ญาติสมาคเม โปกฺขรวสฺสํ วสติ อตีเตปิ วสฺสีติ อิมิสฺสา อตฺถุปฺปตฺติยา เวสฺสนฺตรชาตกํ กเถสิ ฯ ธมฺมเทสนํ สุตฺวา สพฺเพ อุฏฺฐาย วนฺทิตฺวา ปทกฺขิณํ กตฺวา ปกฺกมึสุ ฯ เอโกปิ ราชา วา ราชมหามตฺโต วา เสฺว อมฺหากํ ภิกฺขํ คณฺหถาติ วตฺวา คโต นาม นตฺถิ ฯ ภควา ทุติยทิวเส วีสติภิกฺขุสหสฺสปริวาโร กปิลวตฺถุํ ปิณฺฑาย ปาวิสิ ฯ น โกจิ ปจฺจุคฺคนฺตฺวา นิมนฺเตสิ วา ปตฺตํ วา อคฺคเหสิ ฯ ภควา อินฺทขีเล ฐิโต อาวชฺเชสิ กถํ นุโข ปุพฺเพ พุทฺธา กุลนคเร ปิณฺฑาย จรึสุ กึ อุปฺปฏิปาฏิยา อิสฺสรชนานํ ฆรานิ อคมํสุ อุทาหุ สปทานจาริกํ จรึสูติ ตโต เอกพุทฺธสฺสาปิ อุปฺปฏิปาฏิยา คมนํ อทิสฺวา มยาปิ อิทานิ อยเมว วํโส อยํ ปเวณิ ปคฺคเหตพฺพา อายติญฺจ เม สาวกาปิ มเมว อนุสิกฺขนฺตา ปิณฺฑจาริยวตฺตํ ปูเรสฺสนฺตีติ โกฏิยํ นิวิฏฺฐเคหโต ปฏฺฐาย สปทานํ ปิณฺฑาย จรติ ฯ อยฺโย กิร สิทฺธตฺถกุมาโร ปิณฺฑาย จรตีติ จตุภูมิกาทีสุ ปาสาเทสุ สีหปญฺชรํ วิวริตฺวา มหาชโน ทสฺสนพฺยาวโฏ อโหสิ ฯ ราหุลมาตาปิ เทวี อยฺยปุตฺโต กิร อิมสฺมึเยว นคเร มหตา ราชานุภาเวน สุวณฺณสีวิกาทีหิ วิจริตฺวา อิทานิ เกสมสฺสุํ โอหาเรตฺวา กาสายวตฺถวสโน กปาลหตฺโถ ปิณฺฑาย จรติ โสภติ นุ โข โน วาติ สีหปญฺชรํ วิวริตฺวา โอโลกยมานา ภควนฺตํ นานาวิราคสมุชฺชลาย สรีรปฺปภาย นครวีถิโย โอภาเสตฺวา พุทฺธสิริยา วิโรจมานํ ทิสฺวา อุณฺหีสโต ปฏฺฐาย ยาว ปาทตลา นรสีหคาถาหิ นาม อฏฺฐหิ คาถาหิ อภิตฺถวิตฺวา รญฺโญ สนฺติกํ คนฺตฺวา ตุมฺหากํ ปุตฺโต ปิณฺฑาย จรตีติ รญฺโญ อาโรเจสิ ฯ ราชา ตํ สุตฺวา สํวิคฺคหทโย หตฺเถน สาฏกํ สณฺฐาปยมาโน ตุริตตุริตํ นิกฺขมิตฺวา เวเคน คนฺตฺวา ภควโต ปุรโต ฐตฺวา อาห กึ ภนฺเต อมฺเห ลชฺชาเปถ กิมตฺถํ ปิณฺฑาย จรถ กึ เอตฺตกานํ ภิกฺขูนํ น สกฺกา ภตฺตํ ลทฺธุนฺติ เอวํ สญฺญิโน อหุวตฺถาติ ฯ วํสจาริตฺตเมตํ มหาราช อมฺหากนฺติ ฯ นนุ ภนฺเต อมฺหากํ มหาสมฺมตขตฺติยวํโส นาม วํโส ตตฺถ จ เอกขตฺติโยปิ ภิกฺขาจาโร นาม นตฺถีติ ฯ อยํ มหาราช ราชวํโส นาม ตว วํโส อมฺหากํ ปน พุทฺธวํโส นาม สพฺพพุทฺธาว ปิณฺฑจาริกา อเหสุนฺติ อนฺตรวีถิยํ ฐิโตว