{๑๑๗} เตน โข ปน สมเยนาติ เยน สมเยน ภควตา สิกฺขาปทํ อปฺปญฺญตฺตํ โหติ เตน สมเยน ฯ อนุปชฺฌายกนฺติ อุปชฺฌํ อคาหาเปตฺวา สพฺเพน สพฺพํ อุปชฺฌายวิรหิตํ ฯ เอวํ อุปสมฺปนฺนา เนว ธมฺมโต น อามิสโต สงฺคหํ ลภนฺติ ฯ เต ปริหายนฺติเยว น วฑฺฒนฺติ ฯ น ภิกฺขเว อนุปชฺฌายโกติ อุปชฺฌํ อคาหาเปตฺวา นิรุปชฺฌายโก น อุปสมฺปาเทตพฺโพ ฯ โย อุปสมฺปาเทยฺย อาปตฺติ ทุกฺกฏสฺสาติ สิกฺขาปทปญฺญตฺติโต ปฏฺฐาย เอวํ อุปสมฺปาเทนฺตสฺส อาปตฺติ ฯ กมฺมมฺปน น กุปฺปติ ฯ เกจิ กุปฺปตีติ วทนฺติ ตํ น คเหตพฺพํ ฯ สงฺเฆน อุปชฺฌาเยนาติอาทีสุปิ อุภโตพฺยญฺชน- กุปชฺฌายปริโยสาเนสุ เอเสว นโย ฯ {๑๑๘} อปตฺตกา หตฺเถสุ ปิณฺฑาย จรนฺตีติ โย หตฺเถสุ ปิณฺโฑ ลพฺภติ ตทตฺถาย จรนฺติ ฯ เสยฺยถาปิ ติตฺถิยาติ ยถา อาชีวกนามกา ติตฺถิยา ฯ สูปหยญฺชเนหิ มิสฺเสตฺวา หตฺเถสุ ฐปิตปิณฺฑเมว หิ เต ภุญฺชนฺติ ฯ อาปตฺติ ทุกฺกฏสฺสาติ เอวํ อุปสมฺปาเทนฺตสฺเสว อาปตฺติ โหติ ฯ กมฺมมฺปน น กุปฺปติ ฯ อจีวรกาติ วตฺถูสุปิ เอเสว นโย ฯ ยาจิตเกนาติ ยาว อุปสมฺปทํ

กโรมิ ตาว เทถาติ ยาจิตฺวา คหิเตน ตาวกาลิเกนาติ อตฺโถ ฯ อีทิเสน หิ ปตฺเตน วา จีวเรน วา ปตฺตจีวเรน วา อุปสมฺปาเทนฺตสฺเสว อาปตฺติ โหติ กมฺมมฺปน น กุปฺปติ ตสฺมา ปริปุณฺณปตฺตจีวโรว อุปสมฺปาเทตพฺโพ ฯ สเจ ตสฺส นตฺถิ อาจริยุปชฺฌายา จสฺส ทาตุกามา โหนฺติ อญฺเญหิ วา ภิกฺขูหิ นิรเปกฺเขหิ นิสฺสชฺชิตฺวา อธิฏฺฐานุปคํ ปตฺตจีวรํ ทาตพฺพํ ฯ ปพฺพชฺชาเปกฺขมฺปน ปณฺฑุปลาสํ ยาจิตเกนาปิ ปตฺตจีวเรน ปพฺพาเชตุํ วฏฺฏติ ฯ สภาคฏฺฐาเน วิสฺสาเสน คเหตฺวาปิ ปพฺพาเชตุํ วฏฺฏติ ฯ

สเจ ปน อปกฺกํ ปตฺตํ จีวรุปคานิ จ วตฺถานิ คเหตฺวา อาคโต โหติ ยาว ปตฺโต ปจฺจติ จีวรานิ จ กรียนฺติ ตาว วิหาเร วสนฺตสฺส อนามฏฺฐปิณฺฑปาตํ ทาตุํ วฏฺฏติ ฯ ถาลเก ภุญฺชิตุํ วฏฺฏติ ฯ ปุเรภตฺตํ สามเณรภาคสมโก อามิสภาโค ทาตุํ วฏฺฏติ ฯ เสนาสนคาโห ปน สลากภตฺตอุทฺเทสภตฺตนิมนฺตนาทีนิ จ น วฏฺฏนฺติ ฯ ปจฺฉาภตฺตมฺปิ สามเณรภาคสมโก เตลมธุผาณิตาทิ- เภสชฺชภาโค วฏฺฏติ ฯ สเจ คิลาโน โหติ เภสชฺชมสฺส กาตุํ วฏฺฏติ สามเณรสฺส วิย จ สพฺพํ ปฏิชคฺคนกมฺมนฺติ ฯ

{๑๑๙} หตฺถจฺฉินฺนาทิวตฺถูสุ หตฺถจฺฉินฺโนติ ยสฺส หตฺถตเล วา มณิพนฺเธ วา กปฺปเร วา ยตฺถ กตฺถจิ เอโก วา เทฺว วา หตฺถา ฉินฺนา โหนฺติ ฯ ปาทจฺฉินฺโนติ ยสฺส อคฺคปาเท วา โคปฺผเกสุ วา ชงฺฆาย วา ยตฺถกตฺถจิ เอโก วา เทฺว วา ปาทา ฉินฺนา โหนฺติ ฯ หตฺถปาทจฺฉินฺโนติ ยสฺส วุตฺตปฺปกาเรเนว จตูสุ หตฺถปาเทสุ เทฺว วา ตโย วา สพฺเพ วา หตฺถปาทา ฉินฺนา โหนฺติ ฯ กณฺณจฺฉินฺโนติ ยสฺส กณฺณมูเล วา กณฺณสกฺขลิกาย วา เอโก วา เทฺว วา กณฺณา ฉินฺนา โหนฺติ ฯ ยสฺส ปน กณฺณพุนฺเธ ฉิชฺชนฺติ สกฺกา จ โหติ สงฺฆาเฏตุํ โส กณฺณํ สงฺฆาเฏตฺวา ปพฺพาเชตพฺโพ ฯ นาสจฺฉินฺโนติ ยสฺส อชปทเก วา เอกปูเฏ วา เทฺวปูเฏ วา ยตฺถ กตฺถจิ นาสา ฉินฺนา โหติ ฯ ยสฺส ปน นาสิกา สกฺกา โหติ สนฺเธตุํ โส ตํ ผาสุํ กตฺวา ปพฺพาเชตพฺโพ ฯ กณฺณนาสจฺฉินฺโนติ อุภยวเสน เวทิตพฺโพ ฯ องฺคุลิจฺฉินฺโนติ ยสฺส นขเสสํ อทสฺเสตฺวา เอโก วา พหู วา องฺคุลิโย ฉินฺนา โหนฺติ ฯ ยสฺส ปน สุตฺตตนฺตุมตฺตมฺปิ นขเสสํ ปญฺญายติ ตํ ปพฺพาเชตุํ วฏฺฏติ ฯ อฬจฺฉินฺโนติ ยสฺส จตูสุ องฺคุฏฺฐเกสุ องฺคุลิยํ วุตฺตนเยเนว เอโก วา พหู วา องฺคุฏฺฐกา ฉินฺนา โหนฺติ ฯ กณฺฑรจฺฉินฺโนติ ยสฺส กณฺฑรนามกา มหานหารู ปุรโต วา ปจฺฉโต วา ฉินฺนา โหนฺติ ฯ เตสุ เอกสฺสปิ ฉินฺนตฺตา อคฺคปาเทน วา มูเลน วา จงฺกมติ น วา ปาทํ ปติฏฺฐาเปตุํ สกฺโกติ ฯ ผณหตฺถโกติ ยสฺส วคฺคุลิปกฺขกา วิย องฺคุลิโย สมฺพทฺธา โหนฺติ เอตํ ปพฺพาเชตุกาเมน องฺคุลนฺตริกาโย ผาเลตฺวา สพฺพํ อนฺตรจมฺมํ อปเนตฺวา ผาสุํ กตฺวา ปพฺพาเชตพฺโพ ฯ ยสฺสปิ ฉ องฺคุลิโย โหนฺติ ตํ ปพฺพาเชตุกาเมน อธิกงฺคุลึ ฉินฺทิตฺวา ผาสุํ กตฺวา ปพฺพาเชตพฺโพ ฯ ขุชฺโชติ โย อุรสฺส วา ปิฏฺฐิยา วา ปสฺสสฺส วา นิกฺขนฺตตฺตา ขุชฺชสรีโร ฯ ยสฺส ปน กิญฺจิ องฺคปจฺจงฺคํ อีสกํ วงฺกํ ตํ ปพฺพาเชตุํ วฏฺฏติ ฯ มหาปุริโสเอว หิ พฺรหฺมุชุคตฺโต อวเสโส สตฺโต อขุชฺโช นาม นตฺถิ ฯ วามโนติ ชงฺฆวามโน วา กฏิวามโน วา อุภยวามโน วา ฯ ชงฺฆวามนสฺส กฏิโต ปฏฺฐาย เหฏฺฐิมกาโย รสฺโส โหติ อุปริมกาโย ปริปุณฺโณ ฯ กฏิวามนสฺส กฏิโต ปฏฺฐาย อุปริม- กาโย รสฺโส โหติ เหฏฺฐิมกาโย ปริปุณฺโณ ฯ อุภยวามนสฺส อุโภปิ กายา รสฺสา โหนฺติ เยสํ รสฺสตฺตา ภูตานํ วิย ปริวฏุโม มหากุจฺฉิฆฏสทิโส อตฺตภาโว โหติ ตํ ติวิธมฺปิ ปพฺพาเชตุํ น วฏฺฏติ ฯ คลคณฺฑีติ ยสฺส กุมฺภณฺฑํ วิย คเล คณฺโฑ โหติ ฯ เทสนามตฺตเมว เจตํ ฯ ยสฺมึ กิสฺมิญฺจิ ปน ปเทเส คณฺเฑ สติ น ปพฺพาเชตพฺโพ ฯ ตตฺถ วินิจฺฉโย น ภิกฺขเว ปญฺจหิ อาพาเธหิ ผุฏฺโฐ ปพฺพาเชตพฺโพติ เอตฺถ วุตฺตนเยเนว เวทิตพฺโพ ฯ ลกฺขณาหตกสาหตลิขิตเกสุ ยํ วตฺตพฺพํ ตํ น ภิกฺขเว ลกฺขณาหโตติ- อาทีสุ วุตฺตเมว ฯ สีปทีติ ภารปาโท วุจฺจติ ฯ ยสฺส ปาโท ถูโล โหติ สญฺชาตปีฬโก ขโร โส น ปพฺพาเชตพฺโพ ฯ ยสฺส ปน น ตาว ขรภาวํ คณฺหาติ สกฺกา โหติ อุปนาหํ พนฺธิตฺวา อุทกอาวาเฏ ปเวเสตฺวา อุทกวาลิกาย ปูเรตฺวา ยถา สิรา ปญฺญายนฺติ ชงฺฆา จ เตลนาฬิกา วิย โหติ เอวํ มิลาเปตุํ ตสฺส ปาทํ อีทิสํ กตฺวา ตํ ปพฺพาเชตุํ วฏฺฏติ ฯ สเจ ปุน วฑฺฒติ อุปสมฺปาเทนฺเตนาปิ ตถา กตฺวา อุปสมฺปาเทตพฺโพ ฯ