ปาปโรคีติ อริสภคนฺทรปิตฺตเสมฺหกาสสาสาทีสุ เยน เกนจิ โรเคน นิจฺจาตุโร อเตกิจฺฉโรโค เชคุจฺโฉ อมนาโป อยมฺปิ น ปพฺพาเชตพฺโพ ฯ ปริสทูสโกติ โย อตฺตโน วิรูปตาย ปริสํ ทูเสติ อติทีโฆ วา โหติ อญฺเญสํ สีสปฺปมาณนาภิปฺปเทโส อติรสฺโส วา อุภยวามนภูตรูปํ วิย อติกาโฬ วา ฌาปิตเขตฺตขาณุโก วิย อจฺโจทาโต วา ทธิตกฺกาทีหิ ปมชฺชิตปตฺตตมฺพโลหวณฺโณ อติกีโส วา มนฺทมํสโลหิโต อฏฺฐิสิราจมฺมสรีโร วิย อติถูโล วา ภาริยมํโส มโหทโร มหาภูตสทิโส อติมหนฺตสีโส วา ปจฺฉึ สีเส กตฺวา ฐิโต วิย อติขุทฺทกสีโส วา สรีรสฺส อนนุรูเปน อติขุทฺทเกน สีเสน สมนฺนาคโต กุฏกุฏกสีโส วา ตาลผลปิณฺฑ- สทิเสน สีเสน สมนฺนาคโต สิขรสีโส วา อุทฺธํ อนุปุพฺพตนุเกน สีเสน สมนฺนาคโต นาฬิสีโส วา มหาเวฬุปพฺพสทิเสน สีเสน สมนฺนาคโต กปฺปสีโส วา ปพฺภารสีโส วา จตูสุ ปสฺเสสุ เยน เกนจิ ปสฺเสน โอนเตน สีเสน สมนฺนาคโต วณสีโส วา ปูติสีโส วา กณฺณิกเกโส วา ปาณเกหิ ขายิตเกทาเร สสฺสสทิเสหิ ตหึ ตหึ อุฏฺฐิเตหิ เกเสหิ สมนฺนาคโต นิลฺโลมสีโส วา ถูลตฺถทฺธเกโส วา ตาลหิรสทิเสหิ เกเสหิ สมนฺนาคโต ชาติปลิเตหิ ปณฺฑรเกโส วา ปกติตมฺพเกโส วา อาทิตฺเตหิ วิย เกเสหิ สมนฺนาคโต อาวฏฺฏสีโส วา คุนฺนํ สรีเร อาวฏฺฏสทิเสหิ อุทฺธคฺเคหิ เกสาวฏฺเฏหิ สมนฺนาคโต ฯ สีสโลเมหิ สทฺธึ เอกาพทฺธภมุกโลโม วา ชาลพทฺเธน วิย นลาเฏน สมนฺนาคโต

สมฺพทฺธภมุโก วา นิลฺโลมภมุโก วา มกฺกฏภมุโก วา อติมหนฺตกฺขิ วา อติขุทฺทกกฺขิ วา มหีสจมฺเม วาสิโกเณน ปหริตฺวา กตฉิทฺทสทิเสหิ อกฺขีหิ สมนฺนาคโต ฯ วิสมกฺขิ วา เอเกน มหนฺเตน เอเกน ขุทฺทเกน อกฺขินา สมนฺนาคโต ฯ วิสมจกฺกโล วา เอเกน อุทฺธํ เอเกน อโธติ เอวํ วิสมชาเตหิ อกฺขิจกฺกเลหิ สมนฺนาคโต เกกโร วา คมฺภีรกฺขิ วา ยสฺส คมฺภีเร อุทปาเน อุทกตารกา วิย อกฺขิตารกา ปญฺญายนฺติ นิกฺขนฺตกฺขิ วา ยสฺส กกฺกฏกสฺเสว อกฺขิตารกา นิกฺขนฺตา โหนฺติ หตฺถิกณฺโณ วา มหนฺตาหิ กณฺณสกฺขลิกาหิ สมนฺนาคโต มูสิกกณฺโณ วา ชตุกกณฺโณ วา ขุทฺทกาหิ กณฺณสกฺขลิกาหิ สมนฺนาคโต ฯ ฉิทฺทมตฺตกณฺโณ วา ยสฺส วินา กณฺณสกฺขลิกาหิ กณฺณฉิทฺท- มตฺตเมว โหติ อวิทฺธกณฺโณ ๑- วา โยนกชาติโก ปน ปริสทูสโก น โหติ สภาโวเยว หิ โส ตสฺส กณฺณภคนฺทริโก วา นิจฺจปูตินา กณฺเณน สมนฺนาคโต คณฺฑกณฺโณ วา สทา ปคฺฆริตปุพฺเพน กณฺเณน สมนฺนาคโต วงฺกิตกณฺโณ วา โคภตฺตนาฬิกาย อคฺคสทิเสหิ กณฺเณหิ สมนฺนาคโต อติปิงฺคลกฺขิ วา มธุปิงฺคลกฺขึ ปน ปพฺพาเชตุํ วฏฺฏติ นิปฺปขุมกฺขิ วา อสฺสุปคฺฆรณกฺขิ วา ปุปฺผิตกฺขิ อกฺขิปาเกน สมนฺนาคตกฺขิ วา อติมหนฺตนาสิโก วา อติขุทฺทกนาสิโก วา วิปิฏนาสิโก วา มชฺเฌ อปฺปติฏฺฐหิตฺวา เอกปสฺเส ฐิตวงฺกนาสิโก วา ทีฆนาสิโก วา สูกรตุณฺฑสทิสาย ชิวฺหาย เลหิตุํ สกฺกุเณยฺยาย นาสิกาย สมนฺนาคโต ฯ นิจฺจปคฺฆริตสิงฺฆานิกนาโส วา มหามุโข วา ยสฺส