ขรมณฺฑูกสฺเสว มุขนิมิตฺตํเยว มหนฺตํ โหติ มุขํ ปน ลาพุสทิสํ อติขุทฺทกํ ภินฺนมุโข วา วงฺกมุโข วา มหาโอฏฺโฐ วา อุกฺขลิมุขวฏฺฏิสทิเสหิ โอฏฺเฐหิ สมนฺนาคโต ฯ ตนุกโอฏฺโฐ วา เภริจมฺมสทิเสหิ ทนฺเต ปิทหิตุํ อสมตฺเถหิ โอฏฺเฐหิ สมนฺนาคโต มหาอธโรฏฺโฐ วา ตนุกอุตฺตโรฏฺโฐ วา ตนุกอธโรฏฺโฐ วา มหาอุตฺตโรฏฺโฐ วา โอฏฺฐจฺฉินฺนโก วา เอฬมุโข วา อุปกฺกมุโข วา สงฺขตุณฺฑโก วา พหิเสเตหิ อนฺโตอติรตฺเตหิ โอฏฺเฐหิ สมนฺนาคโต ทุคฺคนฺธกุณปมุโข วา มหาทนฺโต วา อฏฺฐก- ทนฺตกสทิเสหิ ทนฺเตหิ สมนฺนาคโต อสุรทนฺโต วา เหฏฺฐา วา อุปริ วา พหิ นิกฺขนฺตทนฺโต ยสฺส ปน สกฺกา โหติ โอฏฺเฐหิ ปิทหิตุํ กเถนฺตสฺเสว ปญฺญายติ โน อกเถนฺตสฺส ตํ ปพฺพาเชตุํ วฏฺฏติ ปูติทนฺโต วา นิทฺทนฺโต วา ยสฺส ปน ทนฺตนฺตเร กลนฺทกทนฺโต วิย สุขุมทนฺโต โหติ ตํ ปพฺพาเชตุํ วฏฺฏติ

มหาหนุโก วา โคหนุสทิเสน หนุนา สมนฺนาคโต ทีฆหนุโก วา วิปิฏหนุโก วา อนฺโต ปวิฏฺเฐน วิย อติรสฺเสน หนุเกน สมนฺนาคโต ภินฺนหนุโก วา วงฺกหนุโก วา นิมฺมสฺสุทาฐิโก วา ภิกฺขุนีสทิสมุโข ทีฆคโล วา พกคลสทิเสน คเลน สมนฺนาคโต รสฺสคโล วา อนฺโตปวิฏฺเฐน วิย คเลน สมนฺนาคโต ภินฺนคโล วา ภฏฺฐอํสกูโฏ วา อหตฺโถ วา เอกหตฺโถ วา อติรสฺสหตฺโถ วา อติทีฆหตฺโถ วา ภินฺนอุโร วา ภินฺนปิฏฺฐิ วา กจฺฉุคตฺโต วา กณฺฑุคตฺโต วา ททฺทุคตฺโต วา โคธาคตฺโต วา ยสฺส โคธา วิย คตฺตโต จุณฺณานิ ปตนฺติ สพฺพญฺเจตํ วิรูปกรณํ สนฺธาย วิตฺถาริกวเสน วุตฺตํ ฯ วินิจฺฉโย ปเนตฺถ น ภิกฺขเว ปญฺจหิ อาพาเธหิ ผุฏฺโฐติ เอตฺถ วุตฺตนเยเนว เวทิตพฺโพ ฯ

ภฏฺฐกฏิโก วา มหาอานิสโท วา อุทฺธนกุฏสทิเสหิ อานิสทมํเสหิ อจฺจุคฺคเตหิ สมนฺนาคโต ฯ มหาอูรุโก วา วาตณฺฑิโก วา มหาชานุโก วา สงฺฆฏฺฏนชานุโก วา ทีฆชงฺโฆ วา ยฏฺฐิสทิสชงฺโฆ วิกโฏ วา สณฺโฑ วา อุพฺพทฺธปิณฺฑิโก วา โส ทุวิโธ เหฏฺฐาโอรูฬฺหาหิ วา อุปริอารูฬฺหาหิ วา มหตีติ ชงฺฆปิณฺฑิกาหิ สมนฺนาคโต มหาชงฺโฆ วา ถูลชงฺฆปิณฺฑิโก วา มหาปาโท วา มหาปณฺหิ วา สิฏฺฐกปาโท วา ปาทเวมชฺฌโต อุฏฺฐิตชงฺโฆ วงฺกปาโท วา โส ทุวิโธ อนฺโต วา พหิ วา ปริวตฺตปาโท คณฺฐิกงฺคุลิโก วา สิงฺคิเวรผณสทิสาหิ องฺคุลีหิ สมนฺนาคโต อนฺธนโข วา กาฬวณฺเณหิ ปูตินเขหิ สมนฺนาคโต ฯ สพฺโพปิ เอส ปริสทูสโก ฯ เอวรูโป ปริสทูสโก น ปพฺพาเชตพฺโพ ฯ