{๑๒๒} โคตฺเตนปิ อนุสฺสาเวตุนฺติ มหากสฺสปสฺส อุปสมฺปทาเปกฺโขติ เอวํ โคตฺตํ วตฺวา อนุสฺสาเวตุํ อนุชานามีติ อตฺโถ ฯ {๑๒๓} เทฺว เอกานุสฺสาวเนติ เทฺว เอกโต อนุสฺสาวเน ฯ เอเกน เอกสฺส อญฺเญน อิตรสฺสาติ เอวํ ทฺวีหิ วา อาจริเยหิ เอเกน วา เอกกฺขเณ กมฺมวาจํ อนุสฺสาเวนฺเตหิ อุปสมฺปาเทตุํ อนุชานามีติ อตฺโถ ฯ เทฺว ตโย เอกานุสฺสาวเน กาตุํ ตญฺจ โข เอเกน อุปชฺฌาเยนาติ เทฺว วา ตโย วา ชเน ปุริมนเยเนว เอกโต อนุสฺสาวเน กาตุํ อนุชานามิ ฯ ตญฺจ โข อนุสฺสาวนกิริยํ เอเกน อุปชฺฌาเยน อนุชานามีติ อตฺโถ ฯ ตสฺมา เอเกน อาจริเยน เทฺว วา ตโย วา อนุสฺสาเวตพฺพา ทฺวีหิ วา ตีหิ วา อาจริเยหิ วิสุํ วิสุํ เอเกน เอกสฺสาติ เอวํ เอกปฺปหาเรเนว เทฺว ติสฺโส วา กมฺมวาจา กาตพฺพา ฯ สเจ ปน นานาจริยา นานุปชฺฌายา จ โหนฺติ ติสฺสตฺเถโร สุมนตฺเถรสฺส สทฺธิวิหาริกํ สุมนตฺเถโร ติสฺสตฺเถรสฺส สทฺธิวิหาริกํ อนุสฺสาเวติ อญฺญมญฺญญฺจ คณปูรกา โหนฺติ วฏฺฏติ ฯ สเจ ปน นานาอุปชฺฌายา โหนฺติ เอโก อาจริโย โหติ น เตฺวว นานุปชฺฌาเยนาติ ปฏิกฺขิตฺตตฺตา น วฏฺฏติ ฯ อิทํ สนฺธาย หิ เอส ปฏิกฺเขโป ฯ

{๑๒๖} ปฐมํ อุปชฺฌํ คาหาเปตพฺโพติ เอตฺถ วชฺชาวชฺชํ อุปนิชฺฌายตีติ อุปชฺฌา ตํ อุปชฺฌํ อุปชฺฌาโย เม ภนฺเต โหหีติ เอวํ วทาเปตฺวา คาหาเปตพฺโพ ฯ วิตฺถายนฺตีติ วิตฺถทฺธคตฺตา โหนฺติ ฯ อุลฺลุมฺปตุ มนฺติ อุทฺธรตุ มํ ฯ {๑๒๘} ตาวเทวาติ อุปสมฺปนฺนสมนนฺตรเมว ฯ ฉายา เมตพฺพาติ เอกโปริสา วา ทฺวิโปริสา วาติ ฉายา เมตพฺพา ฯ อุตุปฺปมาณํ อาจิกฺขิตพฺพนฺติ วสฺสาโน เหมนฺโต คิมฺโหติ เอวํ อุตุปฺปมาณํ อาจิกฺขิตพฺพํ ฯ เอตฺถ จ อุตุเยว อุตุปฺปมาณํ ฯ สเจ วสฺสานาทโย อปริปุณฺณา โหนฺติ ยตฺตเกหิ ทิวเสหิ ยสฺส โย อุตุ อปริปุณฺโณ เต ทิวเส สลฺลกฺเขตฺวา โส ทิวสภาโค อาจิกฺขิตพฺโพ ฯ อถวา อยํ นาม อุตุ โส จ โข ปริปุณฺโณ วา อปริปุณฺโณ วาติ เอวํ อุตุปฺปมาณํ อาจิกฺขิตพฺพํ ฯ ปุพฺพณฺโห วา สายณฺโห วาติ เอวํ ทิวสภาโค อาจิกฺขิตพฺโพ ฯ สงฺคีตีติ อิทเมว สพฺพํ เอกโต กตฺวา ตฺวํ กึ ลภสิ กา เต ฉายา กึ อุตุปฺปมาณํ โก ทิวสภาโคติ ปุฏฺโฐ อิทํ นาม ลภามิ วสฺสํ วา เหมนฺตํ วา คิมฺหํ วา อยํ เม ฉายา อิทํ อุตุปฺปมาณํ อยํ ทิวสภาโคติ วเทยฺยาสีติ เอวํ อาจิกฺขิตพฺพํ ฯ