{๑๖๔} กาเยน วิญฺญาเปตีติ ปาริสุทฺธิทานํ เยน เกนจิ องฺคปจฺจงฺเคน วิญฺญาเปติ ชานาเปติ วาจมฺปน นิจฺฉาเรตุํ สกฺโกนฺโต วาจาย วิญฺญาเปติ อุภยถาปิ สกฺโกนฺโต กายวาจาทีหิ ฯ สงฺเฆน ตตฺถ คนฺตฺวา อุโปสโถ กาตพฺโพติ สเจ พหู ตาทิสา คิลานา โหนฺติ สงฺเฆน ปฏิปาฏิยา ฐตฺวา สพฺเพ หตฺถปาเส กาตพฺพา ฯ สเจ ทูเร โหนฺติ สงฺโฆ นปฺปโหติ ตํ ทิวสํ อุโปสโถ น กาตพฺโพ น เตฺวว วคฺเคน สงฺเฆน อุโปสโถ กาตพฺโพ ฯ

ตตฺเถว ปกฺกมตีติ สงฺฆมชฺฌํ อนาคนฺตฺวา ตโตว กตฺถจิ คจฺฉติ ฯ สามเณโร ปฏิชานาตีติ สามเณโร อหนฺติ เอวํ ปฏิชานาติ ภูตํเยว วา สามเณรภาวํ อาโรเจติ ปจฺฉา วา สามเณรภูมิยํ ติฏฺฐตีติ อตฺโถ ฯ เอส นโย สพฺพตฺถ ฯ สงฺฆปฺปตฺโต ปกฺกมตีติ สพฺพนฺติเมน ปริจฺเฉเทน อุโปสถตฺถาย สนฺนิปติตานํ จตุนฺนํ ภิกฺขูนํ หตฺถปาสํ ปตฺวา ปกฺกมติ ฯ เอส นโย สพฺพตฺถ ฯ เอตฺถ จ เอเกน พหูนมฺปิ อาหฏา ปาริสุทฺธิ อาหฏาว โหติ ฯ สเจ ปน โส อนฺตรามคฺเคน อญฺญํ ภิกฺขุํ ทิสฺวา เยสํ เตน ปาริสุทฺธิ คหิตา เตสญฺจ อตฺตโน จ ปาริสุทฺธึ เทติ ตสฺเสว ปาริสุทฺธิ อาคจฺฉติ อิตรา ปน พิลาลสงฺขลิกปาริสุทฺธิ นาม โหติ สา น อาคจฺฉติ ฯ สุตฺโต น อาโรเจตีติ อาคนฺตฺวา สุปติ อสุเกน ภนฺเต. ปาริสุทฺธิ ทินฺนาติ น อาโรเจติ ฯ ปาริสุทฺธิหารกสฺส อนาปตฺตีติ เอตฺถ สเจ สญฺจิจฺจ นาโรเจติ ทุกฺกฏํ อาปชฺชติ ปาริสุทฺธิ ปน อาหฏาว โหติ ฯ อสญฺจิจฺจ อนาโรจิตตฺตา ปนสฺส อนาปตฺติ อุภินฺนมฺปิ จ อุโปสโถ กโตเยว โหติ ฯ

{๑๖๕} ฉนฺททาเนปิ ปาริสุทฺธิทาเน วุตฺตสทิโสเยว วินิจฺฉโย ฯ ปาริสุทฺธึ เทนฺเตน ฉนฺทมฺปิ ทาตุนฺติ เอตฺถ สเจ ปาริสุทฺธิเมว เทติ น ฉนฺทํ อุโปสโถ กโต โหติ ยมฺปน สงฺโฆ อญฺญํ กมฺมํ กโรติ ตํ อกตํ โหติ ฯ ฉนฺทเมว เทติ น ปาริสุทฺธึ ภิกฺขุสงฺฆสฺส อุโปสโถปิ กมฺมมฺปิ กตเมว โหติ ฉนฺททายกสฺส ปน อุโปสโถ อกโตเยว โหติ ฯ สเจปิ โกจิ ภิกฺขุ นทิยา วา สีมาย วา อุโปสถํ อธิฏฺฐหิตฺวา อาคจฺฉติ กโต มยา อุโปสโถติ อจฺฉิตุํ น ลภติ สามคฺคี วา ฉนฺโท วา ทาตพฺโพ ฯ

{๑๖๗} สรติปิ อุโปสถํ นปิ สรตีติ เอกทา สรติ เอกทา น สรติ ฯ อตฺถิ เนว สรตีติ โย เอกนฺตํ เนว สรติ ตสฺส สมฺมติทานกิจฺจํ นตฺถิ ฯ