Pavāraṇākkhandhakavaṇṇanā

{209} pavāraṇākkhandhake neva ālapeyyāma na sallapeyyāmāti ettha ālāpo nāma paṭhamavacanaṃ sallāpo nāma pacchimavacanaṃ. Hatthavilaṅghakenāti hatthukkhepakena. Pasusaṃvāsanti pasūnaṃ viya saṃvāsaṃ. Pasavopi hi attano uppannaṃ sukhadukkhaṃ aññamaññassa na ārocenti paṭisanthāraṃ na karonti tathā etepi akaṃsu. Tasmā nesaṃ saṃvāso pasusaṃvāsoti vuccati. Esa nayo sabbattha. Na bhikkhave mūgavattaṃ titthiyasamādānanti imaṃ temāsaṃ na kathetabbanti evarūpaṃ vattasamādānaṃ na kātabbaṃ. Adhammikakatikā hi esā. Aññamaññānulomatāti aññamaññaṃ vattuṃ anulomabhāvo. Vadantu maṃ āyasmantoti hi vadantaṃ sakkā hoti kiñci vattuṃ na itaraṃ. Āpattivuṭṭhānatā vinayapurekkhāratāti āpattīhi vuṭṭhānabhāvo vinayaṃ purato katvā caraṇabhāvo. Vadantu maṃ āyasmantoti hi vadanto āpattīhi vuṭṭhahissati vinayañca purakkhitvā viharatīti vuccati. {210} Suṇātu me bhante saṅgho ajja pavāraṇā yadi saṅghassa pattakallaṃ saṅgho pavāreyyāti ayaṃ sabbasaṅgāhikā nāma ñatti. Evaṃ hi vutte tevācikaṃ dvevācikañca ekavācikañca pavāretuṃ vaṭṭati samānavassikameva na vaṭṭati. Tevācikaṃ Pavāreyyāti vutte pana tevācikameva vaṭṭati aññaṃ na vaṭṭati. Dvevācikaṃ pavāreyyāti vutte dvevācikañca tevācikañca vaṭṭati ekavācikañca samānavassikañca na vaṭṭati. Ekavācikaṃ pavāreyyāti vutte pana ekavācikadvevācikatevācikāni vaṭṭanti samānavassikameva na vaṭṭati. Samānavassikanti vutte sabbaṃ vaṭṭati. {211} Acchantīti nisinnāva honti na uṭṭhahanti. Tadanantarāti tadanantaraṃ tāvattakaṃ kālanti attho. {212} Cātuddasikā ca paṇṇarasikā cāti ettha cātuddasikāya ajja pavāraṇā cātuddasīti evaṃ pubbakiccaṃ kātabbaṃ paṇṇarasikāya ajja pavāraṇā paṇṇarasīti.

Pavāraṇākammesu sace ekasmiṃ vihāre pañcasu bhikkhūsu vasantesu ekassa pavāraṇaṃ āharitvā cattāro gaṇañattiṃ ṭhapetvā pavārenti catūsu vā tīsu vā vasantesu ekassa pavāraṇaṃ āharitvā tayo vā dve vā saṅghañattiṃ ṭhapetvā pavārenti sabbametaṃ adhammena vaggaṃ pavāraṇākammaṃ. Sace pana sabbepi pañca janā ekato sannipatitvā gaṇañattiṃ ṭhapetvā pavārenti cattāro vā tayo vā dve vā vasantā ekato sannipatitvā saṅghañattiṃ ṭhapetvā pavārenti sabbametaṃ adhammena samaggaṃ pavāraṇākammaṃ.