{109} Dahare dahareti taruṇe taruṇe. Moligalleti thūlasarīre. Hatthibhaṇḍe assabhaṇḍeti hatthigopake ca assagopake ca. Paṇḍako bhikkhaveti ettha āsittapaṇḍako usuyyapaṇḍako opakkamiyapaṇḍako pakkhapaṇḍako napuṃsakapaṇḍakoti pañca paṇḍakā. Tattha yassa paresaṃ aṅgajātaṃ mukhena gahetvā asucinā āsittassa pariḷāho vūpasammati ayaṃ āsittapaṇḍako. Yassa pana paresaṃ ajjhācāraṃ passato usuyyāya uppannāya pariḷāho vūpasammati ayaṃ usuyyapaṇḍako. Yassa upakkamena bījāni apanītāni ayaṃ opakkamiyapaṇḍako. Ekacco pana akusalavipākānubhāvena kāḷapakkhe paṇḍako hoti juṇhapakkhe panassa pariḷāho vūpasammati ayaṃ pakkhapaṇḍako. Yo pana paṭisandhiyaṃyeva abhāvako uppanno ayaṃ napuṃsakapaṇḍako. Tesu āsittapaṇḍakassa ca usuyyapaṇḍakassa ca pabbajjā na vāritā itaresaṃ tiṇṇaṃ vāritā. Tesupi pakkhapaṇḍakassa yasmiṃ pakkhe paṇḍako hoti tasmiṃyevassa pakkhe pabbajjā vāritāti kurundiyaṃ vuttaṃ. Yassa cettha pabbajjā vāritā taṃ sandhāya idaṃ vuttaṃ anupasampanno nāsetabboti. Sopi liṅga- nāsaneneva nāsetabbo. Ito paraṃ nāsetabboti vuttepi eseva nayo.