{180} Nānāsaṃvāsakādivatthūsu samānasaṃvāsakadiṭṭhinti samānasaṃvāsakā eteti diṭṭhiṃ. Na pucchantīti tesaṃ laddhiṃ na pucchanti apucchitvāva vattapaṭivattaṃ katvā ekato uposathaṃ karonti. Nābhivitarantīti nānāsaṃvāsakabhāvaṃ maddituṃ abhibhavituṃ na sakkonti taṃ diṭṭhiṃ na nissajjāpentīti attho. {181} Sabhikkhukā āvāsāti yasmiṃ āvāse uposathakārakā bhikkhū atthi tamhā āvāsā yaṃ na sakkoti tadaheva gantuṃ so āvāso uposathaṃ akatvā na gantabbo. Aññatra saṅghenāti saṅghapahonakehi bhikkhūhi vinā. Aññatra Antarāyāti pubbe vuttaṃ dasavidhamantarāyaṃ vinā. Sabbantimena pana paricchedena attacatutthena vā attapañcamena vā antarāyepi vā sati gantuṃ vaṭṭati. Anāvāsoti navakammasālādiko yokoci padeso. Yathā ca āvāsādayo na gantabbā evaṃ sace vihāre uposathaṃ karonti uposathādhiṭṭhānatthaṃ sīmāpi nadīpi na gantabbā. Sace panettha koci bhikkhu hoti tassa santikaṃ gantuṃ vaṭṭati. Vissaṭṭhauposathāpi āvāsā gantuṃ vaṭṭati evaṃ gato adhiṭṭhātuṃpi labhati. Araññakenāpi bhikkhunā uposathadivase gāme piṇḍāya caritvā attano vihārameva āgantabbaṃ. Sace aññaṃ vihāraṃ okkamati tattha uposathaṃ katvāva āgantabbaṃ akatvā na vaṭṭati. {182} Yaṃ jaññā sakkomi ajjeva gantunti yaṃ jāneyya ajjeva tattha gantuṃ sakkomīti evarūpo āvāso gantabbo. Tattha bhikkhūhi saddhiṃ uposathaṃ karontenāpi hi iminā neva uposathantarāyo kato bhavissatīti.
{183} Bhikkhuniyā nisinnaparisāyātiādīsu hatthapāsupagamanameva pamāṇaṃ. Aññatra avuṭṭhitāya parisāyāti idaṃ hi pārivāsiya- pārisuddhidānaṃ nāma parisāya vuṭṭhitakālato paṭṭhāya na vaṭṭati avuṭṭhiyā pana vaṭṭati tenāha aññatra avuṭṭhitāya parisāyāti. Tassa lakkhaṇaṃ bhikkhunīvibhaṅge pārivāsiyachandadānavaṇṇanāto gahetabbaṃ. Anuposatheti cātuddasiko ca paṇṇarasiko cāti ime dve uposathe ṭhapetvā aññasmiṃ divase. Aññatra saṅghasāmaggiyāti yā Kosambikabhikkhūnaṃ viya bhinne saṅghe puna saṅghasāmaggī kayirati tathārūpiṃ saṅghasāmaggiṃ ṭhapetvā. Tadā ca suṇātu me bhante saṅgho ajjuposatho sāmaggīti vatvā kātabbo. Ye pana kismiñcideva appamattake sati uposathaṃ ṭhapetvā puna samaggā honti tehi uposathoyeva kātabboti.