Pisācillikāti pisācāyeva pisācillikā. {204} Na bhikkhave rukkhasusireti ettha suddhe rukkhasusireyeva na vaṭṭati. Mahantassa pana susirassa anto padaracchadanaṃ kuṭikaṃ katvā pavisanadvāraṃ yojetvā upagantuṃ vaṭṭati. Rukkhaṃ chinditvā khāṇukamatthake padaracchadanaṃ kuṭikaṃ katvāpi vaṭṭatiyeva. Rukkhaviṭabhiyāti etthāpi suddhe viṭapamatte na vaṭṭati. Mahāviṭape aṭṭakaṃ bandhitvā tattha padaracchadanaṃ kuṭikaṃ katvā upagantabbaṃ. Asenāsanikenāti yassa pañcannaṃ chadanānaṃ aññatarena channaṃ yojitadvārabandhaṃ senāsanaṃ natthi tena na upagantabbaṃ. Na bhikkhave chavakuṭikāyāti ettha chavakuṭikā nāma ṭaṅkitamañcādibhedā kuṭī tattha upagantuṃ na vaṭṭati. Susāne pana aññaṃ kuṭikaṃ katvā upagantuṃ vaṭṭati. Na bhikkhave chatteti etthāpi catūsu thambhesu chattaṃ ṭhapetvā āvaraṇaṃ katvā dvāraṃ yojetvā upagantuṃ vaṭṭati. Chattakuṭikā nāmesā hoti. Cāṭiyāti etthāpi mahantena kapallena chatte vuttanayena kuṭiṃ katvā upagantuṃ vaṭṭati. {205} Evarūpā katikāti etthāpi aññāpi yā īdisā adhammikā katikā hoti sā na kātabbāti attho. Tassā lakkhaṇaṃ mahāvibhaṅge vuttaṃ.
Vassāvāso paṭissuto hoti purimikāyāti tumhākaṃ āvāse purimikāya vassūpanāyikāya vassaṃ vasissāmīti paṭiññā katā hoti. Purimikā ca na paññāyatīti yattha paṭiññātaṃ tattha vassupagamanaṃ na dissatīti. {207-208} Paṭissave ca āpatti dukkaṭassāti ettha na kevalaṃ imaṃ temāsaṃ idha vassaṃ vasathāti etasseva paṭissave āpatti imaṃ temāsaṃ bhikkhaṃ gaṇhatha ubhopi mayaṃ idha vasissāma ekato uddisāpessāmāti evamādināpi tassa tassa paṭissave dukkaṭaṃ. Tañca kho paṭhamaṃ suddhacittassa pacchā visaṃvādanapaccayā. Paṭhamampi asuddhacittassa pana paṭissave pācittiyaṃ visaṃvādane dukkaṭanti pācittiyena saddhiṃ dukkaṭaṃ yujjati. So tadaheva akaraṇīyoti- ādīsu sace vassaṃ anupagantvā vā pakkamati upagantvā vā sattāhaṃ bahiddhā vītināmeti purimikā ca na paññāyati paṭissave ca āpatti. Vassaṃ upagantvā pana aruṇaṃ anuṭṭhāpetvā tadaheva sattāhakaraṇīyena pakkamantassāpi antosattāhe nivattantassa anāpatti ko pana vādo dvīhatīhaṃ vasitvā antosattāhe Nivattantassa. Dvīhatīhaṃ vasitvāti etthāpi nirapekkhagamaneneva upacārātikkame vassacchedo veditabbo. Sace idha vasissāmīti ālayo atthi asatiyā pana vassaṃ na upeti gahitasenāsanaṃ sugahitaṃ chinnavasso na hoti pavāretuṃ labhatiyeva. Sattāhaṃ anāgatāya pavāraṇāyāti ettha navamito paṭṭhāya gantuṃ vaṭṭati āgacchatu vā mā vā anāpatti. Sesaṃ uttānamevāti.