Upajjhāyamūlakaṃ cīvaraṃ pariyesitabbanti upajjhāyaṃ issaraṃ katvā tassa cīvaraṃ pariyesitabbaṃ. Pattampi tatheva. Tasmā yadi upajjhāyassa pattacīvaraṃ atthi imassa dehīti vattabbo. Atha natthi aññe dātukāmā honti tehipi upajjhāyasseva dātabbaṃ imaṃ tumhākaṃ katvā imassa dethāti. Kasmā. Titthiyā nāma vilomā honti saṅghena me pattacīvaraṃ dinnaṃ kiṃ mayhaṃ tumhesu āyatanti vatvā ovādānusāsaniṃ na kareyyuṃ. Upajjhāye pana āyatajīvikattā tassa vacanakaro bhavissati. Tenassa upajjhāyamūlakaṃ cīvaraṃ pariyesitabbanti Vuttaṃ. Bhaṇḍukammāyāti kesoropanatthaṃ. Bhaṇḍukammakathā parato āgamissati. Aggikāti aggiparicaraṇakā. Jaṭilakāti tāpasā. Ete bhikkhave kiriyavādinoti ete kiriyaṃ nappaṭibāhanti atthi kammaṃ atthi kammavipākoti evaṃ diṭṭhikā. Sabbabuddhā hi nekkhammapāramiṃ pūrayamānā etameva pabbajjaṃ pabbajitvā pāramiṃ pūresuṃ mayāpi tatheva pūritā na etesaṃ sāsane pabbajjā vilomā tasmā upasampādetabbā na tesaṃ parivāso dātabbo. Imāhaṃ bhikkhave ñātīnaṃ āveṇikaṃ parihāraṃ dammīti imaṃ ahaṃ tesaṃ pāṭekkaṃ odissakaṃ parihāraṃ dadāmi. Kasmā evamāha. Te hi titthāyatane pabbajitāpi sāsanassa avaṇṇakāmā na honti amhākaṃ ñātiseṭṭhassa sāsananti vaṇṇavādinova honti tasmā evamāhāti.

Aññatitthiyavatthukathā niṭṭhitā.