Eko sappaphaṇasadiso pabbato tassa upari sīmappamāṇassa atthitāya sīmaṃ bandhanti tassa ce heṭṭhā ākāsapabbhāraṃ hoti sīmā na otarati. Sace panassa vemajjhe sīmappamāṇo susirapāsāṇo hoti otarati. So ca pāsāṇo sīmaṭṭhoyeva hoti. Athāpissa heṭṭhā lenassa kuḍḍo aggakoṭiṃ āhacca tiṭṭhati otarati heṭṭhā ca upari ca sīmāyeva hoti. Sace pana heṭṭhā uparimassa sīmāparicchedassa pārato antolenaṃ hoti bahi sīmā na otarati. Athāpissa uparimassa sīmāparicchedassa orato bahilenaṃ hoti anto sīmā na otarati. Athāpissa upari sīmāparicchedo khuddako heṭṭhā lenaṃ mahantaṃ sīmāpariccheda- matikkamitvā ṭhitaṃ sīmā upariyeva hoti heṭṭhā na otarati. Yadi pana lenaṃ khuddakaṃ sabbapacchimasīmāparimāṇaṃ upari sīmā mahatī. Taṃ ajjhottharitvā ṭhitā sīmā otarati. Atha lenaṃ atikhuddakaṃ sīmappamāṇaṃ na hoti sīmā upariyeva hoti heṭṭhā na otarati. Sace tato upaḍḍhaṃ bhijjitvā sāmaṃ patati sīmappamāṇaṃ sace hoti bahi patitaṃ asīmā. Apatitampana yadi sīmappamāṇaṃ sīmā hotiyeva. Khaṇḍasīmā nīcavatthukā hoti taṃ pūretvā uccavatthukaṃ karonti sīmāyeva. Sīmāya gehaṃ karonti sīmaṭṭhakameva hoti. Sīmāya pokkharaṇiṃ khaṇanti sīmāyeva. Ogho sīmamaṇḍalaṃ ottharitvā gacchati sīmamālake aṭṭaṃ bandhitvā kammaṃ kātuṃ vaṭṭati. Sīmāya heṭṭhā ummaṅganadī hoti iddhimā bhikkhu tattha nisīdati. Sace sā nadī paṭhamaṃ gatā sīmā pacchā baddhā kammaṃ na kopeti. Atha paṭhamaṃ sīmā baddhā pacchā nadī gatā kammaṃ kopeti. Heṭṭhāpaṭhavītale ṭhito pana kopetiyeva. Sīmamālake pana vaṭṭarukkho hoti tassa sākhā vā tato niggatapāroho vā mahāsīmāya paṭhavītalaṃ vā tattha jātarukkhādīni vā āhacca tiṭṭhati mahāsīmaṃ sodhetvā vā kammaṃ kātabbaṃ te vā sākhāpārohā chinditvā bahiṭṭhakā kātabbā. Anāhaccaṭhitasākhādīsu āruḷhabhikkhu hatthapāsaṃ ānetabbo. Evaṃ mahāsīmāya jātarukkhassa sākhā vā pārohā vā vuttanayeneva sīmamālake patiṭṭhāti. Vuttanayeneva sīmaṃ sodhetvā kammaṃ kātabbaṃ. Te vā sākhāpārohā chinditvā bahiṭṭhakā Kātabbā. Sace sīmamālake kamme kayiramāne koci bhikkhu mālakassa anto pavisitvā vehāsaṇṭhitasākhāya nisīdati pādā vāssa bhūmigatā honti nivāsanapārupanaṃ vā bhūmiṃ phusati kammaṃ kātuṃ na vaṭṭati. Pāde pana nivāsanapārupanañca ukkhipāpetvā kātuṃ vaṭṭati. Idañca lakkhaṇaṃ purimanayenapi veditabbaṃ. Ayampana viseso tatra ukkhipāpetvā kātuṃ na vaṭṭati hatthapāsaṃyeva ānetabbo. Sace anto sīmaṭṭho pabbato abbhuggacchati tatraṭṭho bhikkhu hatthapāsaṃ ānetabbo. Iddhiyā antopabbataṃ paviṭṭhepi eseva nayo. Bajjhamānāeva hi sīmā pamāṇarahitaṃ padesaṃ na otarati. Baddhasīmāya jātaṃ yaṅkiñci yatthakatthaci ekasambandhena gataṃ sīmāsaṅkhameva gacchati.