{143} Andhakavindāti rājagahato gāvutamattameva andhakavindaṃ nāma taṃ upanissāya thero vasati tato rājagahaṃ uposathaṃ āgacchanto. Rājagahaṃ hi parikkhipitvā aṭṭhārasa mahāvihārā sabbe ekasīmā dhammasenāpatinā nesaṃ sīmā baddhā tasmā veḷuvane saṅghassa sāmaggīdānatthaṃ āgacchantoti attho. Nadiṃ tarantoti sippiniyaṃ nāma na atikkamanto. Manaṃ vuḷho ahosīti īsakaṃ appattavuḷhabhāvo ahosi. Sā kira nadī gijjhakūṭato otaritvā caṇḍena sotena vahati tattha vegena āgacchantaṃ udakaṃ amanasikaronto thero manaṃ vuḷho ahosi na pana vuḷho udakabbhāhatānissa cīvarāni allāni jātāni. {144} Sammatā sīmā saṅghena ticīvarena avippavāso ṭhapetvā gāmañca gāmūpacārañcāti imissā kammavācāya uppannakālato paṭṭhāya bhikkhūnaṃ purimakammavācā na vaṭṭati. Ayameva thāvarā hoti bhikkhunīnampana ayaṃ na vaṭṭati purimāyeva vaṭṭati. Kasmā. Bhikkhunīsaṅgho hi antogāme vasati. Yadi evaṃ siyā so etāya kammavācāya ticīvaraparihāraṃ na labheyya atthi cassa parihāro tasmā purimāyeva vaṭṭati. Bhikkhunīsaṅghassa hi dvepi sīmāyo labbhanti. Tattha bhikkhūnaṃ sīmaṃ ajjhottharitvāpi tassā antopi bhikkhunīnaṃ sīmaṃ sammannituṃ vaṭṭati. Bhikkhūnampi bhikkhunīsīmāya eseva nayo. Na hi te aññamaññassa Kamme gaṇapūrakā honti na kammavācāvaggaṃ karonti. Ettha ca nigamanagarānampi gāmeneva saṅgaho veditabbo. Gāmūpacāroti parikkhittassa parikkhepo aparikkhittassa parikkhepokāso. Tesu adhiṭṭhitatecīvariko bhikkhu parihāraṃ na labhati. Iti bhikkhūnaṃ avippavāsasīmā gāmañca gāmūpacārañca na ottharati samānasaṃvāsakasīmāva ottharati. Samānasaṃvāsakasīmā cettha attano dhammatāya gacchati. Avippavāsā pana yattha samānasaṃvāsakasīmā tattheva gacchati na hi tassā visuṃ nimittakittanaṃ atthi. Tattha sace avippavāsāya sammatikāle gāmo atthi taṃ sā na ottharati. Sace pana sammatāya sīmāya pacchā gāmo nivisati sopi sīmāsaṅkhaṃyeva gacchati. Yathā ca pacchā niviṭṭho evaṃ paṭhamaṃ niviṭṭhassa pacchā vaḍḍhitappadesopi sīmāsaṅkhameva gacchati. Sacepi sīmāya sammatikāle gehāni katāni pavisissāmāti ālayopi atthi manussā pana appaviṭṭhā porāṇakagāmaṃ vā sagehameva chaḍḍetvā aññattha gatā agāmoyeva esa sīmā ottharati. Sace pana ekampi kulaṃ paviṭṭhaṃ vā āgataṃ vā atthi gāmoyeva sīmā na ottharati.