[165] Tena kho pana samayena chabbaggiyā bhikkhū sīmāya sīmaṃ sambhindanti . bhagavato etamatthaṃ ārocesuṃ . yesaṃ bhikkhave sīmā paṭhamaṃ sammatā tesaṃ taṃ kammaṃ dhammikaṃ akuppaṃ ṭhānārahaṃ yesaṃ bhikkhave sīmā pacchā sammatā tesaṃ taṃ kammaṃ adhammikaṃ kuppaṃ aṭṭhānārahaṃ na bhikkhave sīmāya sīmā sambhinditabbā yo sambhindeyya āpatti dukkaṭassāti. {165.1} Tena kho pana samayena chabbaggiyā bhikkhū sīmāya sīmaṃ ajjhottharanti . bhagavato etamatthaṃ ārocesuṃ . yesaṃ bhikkhave sīmā paṭhamaṃ sammatā tesaṃ taṃ kammaṃ dhammikaṃ akuppaṃ ṭhānārahaṃ yesaṃ bhikkhave pacchā sīmā sammatā tesaṃ taṃ kammaṃ adhammikaṃ kuppaṃ aṭṭhānārahaṃ na bhikkhave sīmāya sīmā ajjhottharitabbā yo ajjhotthareyya āpatti dukkaṭassa anujānāmi bhikkhave sīmaṃ sammannantena sīmantarikaṃ ṭhapetvā sīmaṃ sammannitunti.