ปัจฉาชาตปัจจัย

11. Pacchājātapaccayaniddesavaṇṇanā

Pacchājātapaccayaniddese pacchājātāti yassa kāyassa paccayā honti, tasmiṃ uppajjitvā ṭhite jātā. Purejātassāti tesaṃ uppādato paṭhamataraṃ jātassa jātikkhaṇaṃ atikkamitvā ṭhitippattassa. Imassa kāyassāti imassa catusamuṭṭhānikatisamuṭṭhānikabhūtūpādārūpasaṅkhātassa kāyassa. Ettha ca tisamuṭṭhānikakāyoti āhārasamuṭṭhānassa abhāvato brahmapārisajjādīnaṃ kāyo veditabbo. Ayamettha pālivaṇṇanā. Ayaṃ pana pacchājātapaccayo nāma saṅkhepato ṭhapetvā arūpavipāke avasesā catubhūmikā arūpakkhandhā. So jātivasena kusalākusalavipākakiriyābhedena catudhā bhijjatīti evamettha nānappakārabhedato viññātabbo vinicchayo.

@Footnote: 1 cha.Ma. ārammaṇapurejātapaccayo 2 cha.Ma. purejātapaccayā honti

Evaṃ bhinne panettha pañcavokārabhave uppannaṃ catubhūmikakusalañca akusalañca uppādakkhaṇaṃ atikkamitvā ṭhitippattassa catusamuṭṭhānikatisamuṭṭhānikarūpakāyassa pacchājātapaccayo hoti. Vipākepi ṭhapetvā paṭisandhivipākaṃ avaseso kāmāvacara- rūpāvacaravipāko tasseva ekantena pacchājātapaccayo hoti. Lokuttaropi pañcavokāre uppannavipāko tasseva pacchājātapaccayo hoti. Tebhūmikakiriyāpi pañcavokāre uppannāva vuttappakārassa kāyassa pacchājātapaccayo hoti. Evamettha paccayuppannatopi viññātabbo vinicchayoti.

Pacchājātapaccayaniddesavaṇṇanā niṭṭhitā.