กุศลธรรม ประกอบกับกุศลธรรม

๖. สมฺปยุตฺตวารวณฺณนา

[๓๙๒-๔๐๐] สมฺปยุตฺตวาเร กุสลํ ธมฺมํ สมฺปยุตฺโตติ กุสลํ ธมฺมํ สมฺปยุตฺตปจฺจยํ กตฺวาติ อตฺโถ. เสสเมตฺถ สํสฏฺฐวาเร วุตฺตนเยเนว เวทิตพฺพํ. อวสาเน ปนสฺส "สํสฏฺฐตฺถํ นาม สมฺปยุตฺตตฺถํ, สมฺปยุตฺตตฺถํ นาม สํสฏฺฐตฺถนฺ"ติ อิทํ อุภินฺนมฺปิ เอเตสํ วารานํ อตฺถโต นินฺนานากรณภาวทสฺสนตฺถํ วุตฺตํ. อตฺถโต หิ เอเตปิ ปฏิจฺจ สหชาตา วิย ปจฺจยนิสฺสยา วิย จ นินฺนานากรณา. เอวํ สนฺเตปิ อญฺญมญฺญสฺส อตฺถนิยมนตฺถํ วุตฺตา. "สํสฏฺฐา โยชิตา หยา"ติอาทีสุ ๑- อสมฺปยุตฺตมฺปิ สํสฏฺฐนฺติ วุจฺจติ. "ยา สา วีมํสา โกสชฺชสหคตา โกสชฺชสมฺปยุตฺตา"ติอาทีสุ ๒- อสํสฏฺฐํ ๓- โวกิณฺณมฺปิ สมฺปยุตฺตนฺติ อาคตํ. ๔- อิติ สํสฏฺฐวาเรน เอกุปฺปาทาทิลกฺขณสฺส ๕- สมฺปยุตฺตสฺส สํสฏฺฐภาวํ สมฺปยุตฺตวาเรน จ สํสฏฺฐสฺส เอกุปฺปาทาทิลกฺขณสฺส สมฺปยุตฺตภาวํ นิยาเมตุํ อุโภเปเต วุตฺตา. อปิจ ตถา พุชฺฌนกานํ อชฺฌาสยวเสน เทสนาวิลาเสน นิรุตฺติปฏิสมฺภิทาปฺปเภทชานนวเสน จาปิ เอเต อุโภปิ วุตฺตาติ เวทิตพฺพาติ. ๖-

สมฺปยุตฺตวารวณฺณนา นิฏฺฐิตา.