[๕๔๔] กุศลธรรม เป็นปัจจัยแก่กุศลธรรม โดยอุปนิสสยปัจจัย เป็นต้น

TIPITAKA Volume 40 : PALI ROMAN Abhidhamma Pitaka Vol 7 : Abhi. Pa.(1) Paṭṭhānaṃ

[544] Kusalo dhammo kusalassa dhammassa upanissayapaccayena paccayo ārammaṇūpanissayo anantarūpanissayo pakatūpanissayo. {544.1} Ārammaṇūpanissayo: dānaṃ datvā sīlaṃ samādiyitvā uposathakammaṃ katvā taṃ garuṃ katvā paccavekkhati pubbe suciṇṇāni garuṃ katvā paccavekkhati jhānā vuṭṭhahitvā jhānaṃ garuṃ katvā paccavekkhati sekkhā gotrabhuṃ garuṃ katvā paccavekkhanti vodānaṃ garuṃ katvā paccavekkhanti sekkhā maggā vuṭṭhahitvā maggaṃ garuṃ katvā paccavekkhanti. {544.2} Anantarūpanissayo: purimā purimā kusalā khandhā pacchimānaṃ pacchimānaṃ kusalānaṃ khandhānaṃ upanissayapaccayena paccayo anulomaṃ gotrabhussa anulomaṃ vodānassa gotrabhu maggassa vodānaṃ maggassa upanissayapaccayena paccayo. {544.3} Pakatūpanissayo: saddhaṃ upanissāya dānaṃ deti sīlaṃ samādiyati uposathakammaṃ karoti jhānaṃ uppādeti vipassanaṃ uppādeti maggaṃ uppādeti abhiññaṃ uppādeti samāpattiṃ uppādeti sīlaṃ ... Sutaṃ ... Cāgaṃ ... Paññaṃ upanissāya dānaṃ deti sīlaṃ samādiyati uposathakammaṃ karoti jhānaṃ uppādeti vipassanaṃ uppādeti maggaṃ uppādeti abhiññaṃ uppādeti samāpattiṃ uppādeti saddhā ... sīlaṃ sutaṃ cāgo ... Paññā saddhāya sīlassa sutassa cāgassa paññāya upanissayapaccayena paccayo {544.4} paṭhamassa jhānassa parikammaṃ paṭhamassa jhānassa upanissayapaccayena paccayo dutiyassa jhānassa parikammaṃ dutiyassa jhānassa upanissayapaccayena paccayo tatiyassa jhānassa parikammaṃ tatiyassa jhānassa upanissayapaccayena paccayo catutthassa jhānassa parikammaṃ catutthassa jhānassa upanissayapaccayena paccayo ākāsānañcāyatanassa parikammaṃ ākāsānañcāyatanassa upanissayapaccayena paccayo viññānañcāyatanassa parikammaṃ viññāṇañcāyatanassa upanissayapaccayena paccayo ākiñcaññāyatanassa parikammaṃ ākiñcaññāyatanassa upanissayapaccayena paccayo nevasaññānāsaññāyatanassa parikammaṃ nevasaññānāsaññāyatanassa upanissayapaccayena paccayo {544.5} paṭhamaṃ jhānaṃ dutiyassa jhānassa upanisayapaccayena paccayo .pe. catutthaṃ jhānaṃ ākāsānañcāyatanassa ākāsānañcāyatanaṃ viññāṇañcāyatanassa viññāṇañcātayanaṃ ākiñcaññāyatanassa ākiñcaññāyatanaṃ nevasaññānāsaññāyatanassa upanissayapaccayena paccayo dibbassa cakkhussa parikammaṃ dibbassa cakkhussa upanissayapaccayena paccayo dibbāya sotadhātuyā parikammaṃ dibbāya sotadhātuyā upanissayapaccayena paccayo iddhividhañāṇassa parikammaṃ iddhividhañāṇassa upanissayapaccayena paccayo cetopariyañāṇassa parikammaṃ cetopariyañāṇassa upanissayapaccayena paccayo pubbenivāsānussatiñāṇassa Parikammaṃ pubbenivāsānussatiñāṇassa upanissayapaccayena paccayo yathākammūpagañāṇassa parikammaṃ yathākammūpagañāṇassa upanissayapaccayena paccayo {544.6} anāgataṃsañāṇassa parikammaṃ anāgataṃsañāṇassa upanissayapaccayena paccayo dibbaṃ cakkhu dibbāya sotadhātuyā upanissayapaccayena paccayo dibbā sotadhātu iddhividhañāṇassa upanissayapaccayena paccayo iddhividhañāṇaṃ cetopariyañāṇassa upanissayapaccayena paccayo cetopariyañāṇaṃ pubbenivāsānussatiñāṇassa upanissayapaccayena paccayo pubbenivāsānussatiñāṇaṃ yathākammūpagañāṇassa upanissayapaccayena paccayo yathākammūpagañāṇaṃ anāgataṃsañāṇassa upanissayapaccayena paccayo paṭhamassa maggassa parikammaṃ paṭhamassa maggassa upanissayapaccayena paccayo dutiyassa maggassa parikammaṃ dutiyassa maggassa upanissayapaccayena paccayo tatiyassa maggassa parikammaṃ tatiyassa maggassa upanissayapaccayena paccayo {544.7} catutthassa maggassa parikammaṃ catutthassa maggassa upanissayapaccayena paccayo paṭhamo maggo dutiyassa maggassa upanissayapaccayena paccayo dutiyo maggo tatiyassa maggassa upanissayapaccayena paccayo tatiyo maggo catutthassa maggassa upanissayapaccayena paccayo sekkhā maggaṃ upanissāya anuppannaṃ samāpattiṃ uppādenti uppannaṃ samāpajjanti saṅkhāre aniccato dukkhato anattato vipassanti maggo sekkhānaṃ Atthapaṭisambhidāya dhammapaṭisambhidāya niruttipaṭisambhidāya paṭibhāṇapaṭisambhidāya ṭhānāṭhānakosallassa upanissayapaccayena paccayo.