เรื่องเกณิยชฎิล

{300} Kājehi gāhāpetvāti pañcahi kājasatehi susaṅkhatassa badarapānassa kuṭasahassaṃ gāhāpetvā. Etasmiṃ nidāne etasmiṃ pakaraṇe dhammiṃ kathaṃ katvāti sādhu bhikkhave pānaṃ apivantā samaṇassa gotamassa sāvakā paccayabāhullikāti vādaṃ na uppādayittha mayi ca gāravaṃ akattha mama ca tumhe sugāravaṃ janayittha iti vo ahaṃ iminā kāraṇena suṭṭhu pasannotiādinā nayena dhammiṃ kathaṃ katvā anujānāmi bhikkhave aṭṭha pānānītiādimāha. Tattha ambapānanti āmehi vā pakkehi vā ambehi katapānaṃ. Tattha āmehi karontena ambataruṇāni bhinditvā udake pakkhipitvā ātape ādiccapākena pacitvā parissāvetvā tadahupaṭiggahitehi madhusakkarakappurādīhi yojetvā kātabbaṃ. Evaṃ kataṃ purebhattameva kappati. Anupasampannehi kataṃ labhitvā pana purebhattaṃ paṭiggahitaṃ purebhattaṃ sāmisaparibhogenāpi vaṭṭati pacchābhattaṃ nirāmisaparibhogena yāva aruṇuggamanā vaṭṭati. Esa nayo sabbapānesu. Tesu pana jambupānanti jambuphalehi katapānaṃ. Cocapānanti aṭṭhikehi kadaliphalehi Katapānaṃ. Mocapānanti anaṭṭhikehi kadaliphalehi katapānaṃ. Madhukapānanti madhukānaṃ jātirasena katapānaṃ. Taṃ pana udakasambhinnaṃ vaṭṭati suddhaṃ na vaṭṭati. Muddikapānanti muddikā udake madditvā ambapānaṃ viya katapānaṃ. Sālukapānanti rattuppalanīluppalādīnaṃ sāluke madditvā katapānaṃ. Phārusakapānanti phārusakehi ambapānaṃ viya katapānaṃ. Imāni aṭṭhapānāni sītānipi ādiccapākānipi vaṭṭanti aggipākāni na vaṭṭanti. Dhaññaphalarasanti sattannaṃ dhaññānaṃ phalarasaṃ. Ḍākarasanti pakkaḍākarasaṃ. Yāvakālikapattānañhi purebhattameva raso kappati. Yāvajīvikānaṃ paṭiggahetvā ṭhapitasappiādīhi saddhiṃ pakkānaṃ sattāhaṃ kappati. Sace pana suddhodakena paccati yāvajīvampi vaṭṭati. Khīrādīhi saddhiṃ pacituṃ na vaṭṭati. Aññehi pakkampi ḍākarasasaṅkhameva gacchati. Kurundiyampana yāvakālikapattānampi sītodake madditvā kataraso vā ādiccapāko vā vaṭṭatīti vuttaṃ. Ṭhapetvā madhukapuppharasanti ettha madhukapuppharaso aggipāko vā hotu ādiccapāko vā pacchābhattaṃ na vaṭṭati. Purebhattampi yaṃ pākaṃ gahetvā majjaṃ karonti so ādito paṭṭhāya na vaṭṭati. Madhukapupphampana allaṃ vā sukkhaṃ vā bhajjitaṃ vā tena kataphāṇitaṃ vā yato paṭṭhāya majjaṃ na karoti taṃ sabbaṃ purebhattaṃ vaṭṭati. Ucchuraso nikkasaṭo pacchābhattaṃ vaṭṭati. Iti pānāni anujānantena imepi cattāro rasā anuññātāti.

{301-302} Rojavatthuṃ uttānameva. Tattha sabbañca ḍākanti sappiādīhi pakkaṃ vā apakkaṃ vā yaṅkiñci ḍākaṃ. Piṭṭhakhādanīyanti piṭṭhamayaṃ khādanīyaṃ. Rojo kira idaṃ ubhayampi satasahassaṃ vayaṃ katvā paṭiyādāpesi. Saṅgaraṃ akaṃsūti katikaṃ akaṃsu. Uḷāraṃ kho te idanti sundaraṃ kho te idaṃ. Nāhaṃ bhante ānanda bahukatoti nāhaṃ buddhādigatappasādabahumānena idhāgatoti dasseti.