พระผู้มีพระภาคเสวยพระโอสถถ่าย

กนฺตนฺติ เตน สุตฺเตน วายิตวตฺถํ เอตนฺติปิ วทนฺติ ฯ {๓๓๖} สิเนเหถาติ กึ ปน ภควโต กาโย ลูโข น ลูโข ฯ ภควโต หิ อาหาเร สทา เทวตา ทิพฺโพชํ ปกฺขิปนฺติ สิเนหปานมฺปน สพฺพตฺถ โทเส เตเมติ สิรา มุทุกา กโรติ เตนายํ เอวมาห ฯ ตีณิ อุปฺปลหตฺถานีติ เอกํ อุปฺปลหตฺถํ โอฬาริกโทสหรณตฺถํ เอกํ มชฺฌิมโทสหรณตฺถํ เอกํ สุขุมโทสหรณตฺถํ ฯ น จิรสฺเสว ปกตตฺโต อโหสีติ เอวํ ปกตตฺเต ปน กาเย นาครา ทานํ สมฺปาเทสุํ ฯ ชีวโก อาคนฺตฺวา ภควนฺตํ เอตทโวจ ภควา อชฺช นาครา ตุมฺหากํ ทานํ ทาตุกามา อนฺโตคามํ ปิณฺฑาย ปวิสถาติ ฯ มหาโมคฺคลฺลานตฺเถโร จินฺเตสิ กุโต นุโข อชฺช ภควโต ปฐมปิณฺฑปาโต ลทฺธุํ วฏฺฏตีติ ฯ ตโต จินฺเตสิ โสโณ เสฏฺฐิปุตฺโต เขตฺตปริกมฺมโต ปฏฺฐาย อญฺเญหิ อสาธารณานํ ขีโรทกเสจนสํวฑฺฒานํ คนฺธสาลีนํ โอทนํ ภุญฺชติ ตโต ภควโต ปิณฺฑปาตํ อาหริสฺสามีติ อิทฺธิยา คนฺตฺวา ตสฺส ปาสาทตเล อตฺตานํ ทสฺเสสิ ฯ โส เถรสฺส ปตฺตํ คเหตฺวา ปณีตํ ปิณฺฑปาตํ อทาสิ เถรสฺส จ คมนาการํ ทิสฺวา ภุญฺชถ ภนฺเตติ อาห ฯ เถโร ตมตฺถํ อาโรเจสิ ฯ ภุญฺชถ ภนฺเต อหํ อญฺญํ ภควโต ทสฺสามีติ เถรํ โภเชตฺวา คนฺเธหิ ปตฺตํ อุพฺพตฺติตฺวา ปิณฺฑปาตํ อทาสิ ฯ ตํ เถโร อาหริตฺวา ภควโต อทาสิ ฯ ราชาปิ โข พิมฺพิสาโร อชฺช ภควา กึ ภุญฺชิสฺสตีติ วิหารํ อาคนฺตฺวา ปวิสมาเนว ปิณฺฑปาตคนฺธํ ฆายิตฺวา ภุญฺชิตุกาโม อโหสิ ฯ ภควโต จ ทฺวีสุเยว ปิณฺฑปาเตสุ ภาชนคเตสุ เทวตา โอชํ ปกฺขิปึสุ ยญฺจ สุชาตา อทาสิ ยญฺจ ปรินิพฺพานกาเล จุนฺโท กมฺมารปุตฺโต อญฺเญสุ กวเฬ กวเฬ ปกฺขิปนฺติ ตสฺมา ภควา รญฺโญ อิจฺฉํ ชานิตฺวา อปกฺขิตฺโตชเมว โถกํ ปิณฺฑปาตํ รญฺโญ ทาเปสิ ฯ โส ปริภุญฺชิตฺวา ปุจฺฉิ กึ ภนฺเต อุตฺตรกุรุโต อาภตํ โภชนนฺติ ฯ น มหาราช อุตฺตรกุรุโต อปิจ โข ตเวว รฏฺฐวาสิโน คหปติปุตฺตสฺส โภชนํ เอตนฺติ วตฺวา โสณสฺส สมฺปตฺตึ อาจิกฺขิ ฯ ตํ สุตฺวา ราชา โสณํ ทฏฺฐุกาโม หุตฺวา จมฺมกฺขนฺธเก วุตฺตนเยน อสีติยา กุลปุตฺตสหสฺเสหิ สทฺธึ โสณสฺส อาคมนํ อกาสิ ฯ เต ภควโต ธมฺมเทสนํ สุตฺวา โสตาปนฺนา ชาตา ฯ โสโณ ปน ปพฺพชิตฺวา อรหตฺเต ปติฏฺฐิโต ฯ ภควาปิ เอตทตฺถเมว รญฺโญ ปิณฺฑปาตํ ทาเปสิ ฯ {๓๓๗} เอวํ กตภตฺตกิจฺเจ ภควติ อถโข ชีวโก โกมารภจฺโจ ตํ สิเวยฺยกํ ทุสฺสยุคํ อาทาย ฯเปฯ เอตทโวจ ฯ อติกฺกนฺตวราติ เอตฺถ วินิจฺฉโย มหาขนฺธเก วุตฺตนเยเนว เวทิตพฺโพ ฯ ภควา ภนฺเต ปํสุกูลิโก ภิกฺขุสงฺโฆ จาติ ภควโต หิ พุทฺธตฺตปฺปตฺติโต ปฏฺฐาย ยาว อิทํ วตฺถุํ เอตฺถนฺตเร วีสติ วสฺสานิ น โกจิ ภิกฺขุ คหปติจีวรํ สาทิยิ สพฺเพ ปํสุกูลิกาว อเหสุํ เตนายเมวมาห ฯ คหปติจีวรนฺติ คหปตีหิ ทินฺนจีวรํ ฯ ธมฺมิยา กถายาติ วตฺถทานานิสํสปฏิสํยุตฺตาย กถาย ฯ อิตรีตเรนาปีติ อปฺปคฺเฆนปิ มหคฺเฆนปิ เยน เกนจีติ อตฺโถ ฯ ปาวาโรติ สโลมโก กปฺปาสิกปาวาโร ฯ อนุชานามิ ภิกฺขเว โกชวนฺติ เอตฺถ ปกติโกชวเมว วฏฺฏติ มหาปิฏฺฐิยโกชวํ น วฏฺฏติ ฯ โกชวนฺติ อุณฺณามโย ปาวารสทิโส ฯ

{๓๓๘} กาสิราชาติ กาสีนํ ราชา ปเสนทิสฺส เอกปิติกภาตา เอส ฯ อฑฺฒกาสิยนฺติ เอตฺถ กาสีติ สหสฺสํ วุจฺจติ ตํอคฺฆนโก กาสิโย อยมฺปน ปญฺจสตานิ อคฺฆติ ตสฺมา อฑฺฒกาสิโยติ วุตฺโต เตเนวาห อุปฑฺฒกาสีนํ ขมมานนฺติ ฯ {๓๓๙} อุจฺจาวจานีติ สุนฺทรานิ จ อสุนฺทรานิ จ ฯ ภงฺคนฺนาม โขมอาทีหิ ปญฺจหิ สุตฺเตหิ มิสฺเสตฺวา กตํ ฯ วากมยเมวาติปิ วทนฺติ ฯ {๓๔๐} เอกํเยว ภควตา จีวรํ อนุญฺญาตํ น เทฺวติ เต กิร อิตรีตเรน จีวเรนาติ เอกสฺส คหปติเกน วา ปํสุกูเลน วาติ เอวํ อตฺถํ สลฺลกฺขยึสุ ฯ นาคเมสุนฺติ ยาว เต สุสานโต อาคจฺฉนฺติ ตาว เต น อจฺฉึสุ ปกฺกมึสุเยว ฯ นากามา ภาคํ ทาตุนฺติ น อนิจฺฉาย ทาตุํ ยทิ ปน อิจฺฉนฺติ ทาตพฺโพ ฯ อาคเมสุนฺติ อุปจาเร อจฺฉึสุ ฯ เตน ภควา อาห อนุชานามิ ภิกฺขเว อาคเมนฺตานํ อกามา ภาคํ ทาตุนฺติ ฯ ยทิ ปน มนุสฺสา อิธาคตาเอว คณฺหนฺตูติ เทนฺติ สญฺญาณํ วา กตฺวา คจฺฉนฺติ สมฺปตฺตา คณฺหนฺตูติ สมฺปตฺตานํ สพฺเพสมฺปิ ปาปุณนฺติ ฯ สเจ ฉฑฺเฑตฺวา คตา เยน คหิตํ โส เอว สามี ฯ สทิสา โอกฺกมึสูติ สพฺเพ โอกฺกมึสุ เอกทิสาย วา โอกฺกมึสูติ อตฺโถ ฯ เต กติกํ กตฺวาติ ลทฺธปํสุกูลํ สพฺเพสํ ภาเชตฺวา คณฺหิสฺสามาติ พหิเยว กติกํ กตฺวา ฯ