พระพุทธบัญญัติห้ามใช้ที่นั่งและที่นอนสูงใหญ่

{254} Uccāsayanamahāsayanānīti ettha uccāsayananti pamāṇātikkantaṃ mañcaṃ. Mahāsayananti akappiyapaccattharaṇaṃ. Āsandiādīsu āsandīti pamāṇātikkantāsanaṃ. Pallaṅkoti pādesu (vā) vāḷarūpāni ṭhapetvā kato. Goṇakoti dīghalomako mahākojavo. Caturaṅgulādhikāni kira tassa lomāni. Cittakoti vāḷacitta- uṇṇāmayattharako 1-. Paṭikāti uṇṇāmayo setattharako. Paṭalikāti ghanapupphako uṇṇāmayattharako yonakadamiḷapaṭoti vuccati. Tūlikāti pakatitūlikāyeva. Vikatikāti sīhabyagghādirūpavicitto uṇṇāmayattharako.

@Footnote: 1. yebhuyyena pana vānacitta...iti dissati. Uddhalomīti ekato uggatalomaṃ uṇṇāmayattharaṇaṃ uddhaṃlomītipi pāṭho. Ekantalomīti ubhato uggatalomaṃ uṇṇāmayattharaṇaṃ. Kaṭissanti ratanaparisibbitaṃ koseyyakaṭissamayaṃ paccattharaṇaṃ. Koseyyanti ratanaparisibbitaṃ koseyyasuttamayaṃ paccattharaṇaṃ. Suddhakoseyyaṃ pana vaṭṭati. Kuttakanti soḷasannaṃ nāṭakitthīnaṃ ṭhatvā naccayoggaṃ uṇṇāmayapaccattharaṇaṃ. Hatthattharaassattharā hatthi- assapiṭṭhīsu attharakāeva. Rathattharepi eseva nayo. Ajinap- paveṇīti ajinacammehi mañcappamāṇena sibbitvā katā paveṇi. Kadalīmigapavarapaccattharaṇanti kadalīmigacammannāma atthi tena kataṃ pavarapaccattharaṇaṃ. Uttamapaccattharaṇanti attho. Taṃ kira setavatthassa upari kadalīmigacammaṃ pattharitvā sibbetvā karonti. Sauttaracchadanti saha uttaracchadena uparibaddhena rattavitānena saddhinti attho. Setavitānampi heṭṭhā akappiyapaccattharaṇe sati na vaṭṭati asati pana vaṭṭati. Ubhatolohitakupadhānanti sīsupadhānañca pādupadhānañcāti mañcassa ubhato lohitakupadhānaṃ etaṃ na vaṭṭati. Yampana ekameva upadhānaṃ ubhosu passesu rattaṃ vā hotu padumavaṇṇaṃ vā cittaṃ vā sace pamāṇayuttaṃ vaṭṭati. Mahāupadhānaṃ pana paṭikkhittaṃ. {255} Dīpicchāpoti dīpipotako. Ogumphiyantīti bhittidaṇḍakādīsu veṭhetvā bandhanati. {256} Abhinisīditunti abhi nissāya nisīdituṃ. Gilānena bhikkhunā saupāhanenāti ettha gilāno nāma yo na sakkoti anupāhano gāmaṃ pavisituṃ.