เรื่องความเคารพ

TIPITAKA Volume 7 : PALI ROMAN Vinaya Pitaka Vol 7 : Vinaya. Culla (2)

[260] Athakho bhagavā vesāliyaṃ yathābhirantaṃ viharitvā yena sāvatthī tena cārikaṃ pakkāmi . tena kho pana samayena chabbaggiyānaṃ @Footnote: 1 Ma. Yu. vihāraṃ. Bhikkhūnaṃ antevāsikā bhikkhū buddhappamukhassa saṅghassa purato purato gantvā vihāre pariggaṇhanti seyyāyo pariggaṇhanti idaṃ amhākaṃ upajjhāyānaṃ bhavissati idaṃ amhākaṃ ācariyānaṃ bhavissati idaṃ amhākaṃ bhavissatīti . athakho āyasmā sārīputto buddhappamukhassa saṅghassa piṭṭhito piṭṭhito gantvā vihāresu pariggahitesu seyyāsu pariggahitāsu seyyaṃ alabhamāno aññatarasmiṃ rukkhamūle nisīdi . Athakho bhagavā rattiyā paccūsasamayaṃ paccuṭṭhāya ukkāsi . āyasmāpi sārīputto ukkāsi . ko etthāti . ahaṃ bhagavā sārīputtoti . Kissa tvaṃ sārīputta idha nisinnoti . athakho āyasmā sārīputto bhagavato etamatthaṃ ārocesi.