ว่าด้วยอานิสงส์เป็นต้น

{๓๒๘} อฏฺฐเกสุ ฯ อฏฺฐานิสํเสติ น มยํ อิมินา ภิกฺขุนา สทฺธึ อุโปสถํ กริสฺสาม วินา อิมินา ภิกฺขุนา อุโปสถํ กริสฺสาม น มยํ อิมินา ภิกฺขุนา สทฺธึ ปวาเรยฺยาม สงฺฆกมฺมํ กริสฺสาม อาสเน นิสีทิสฺสาม ยาคุปาเน นิสีทิสฺสาม ภตฺตคฺเค นิสีทิสฺสาม เอกจฺฉนฺเน วสิสฺสาม ยถาวุฑฺฒํ อภิวาทนํ ปจฺจุปฏฺฐานํ อญฺชลีกมฺมํ สามีจิกมฺมํ กริสฺสาม วินา อิมินา ภิกฺขุนา กริสฺสามาติ เอวํ โกสมฺพิกกฺขนฺธเก วุตฺเต อานิสํเส ฯ ทุติยอฏฺฐเกปิ เอเสว นโย ฯ ตมฺปิ หิ เอวเมว โกสมฺพิกกฺขนฺธเก วุตฺตํ ฯ อฏฺฐ ยาวตติยกาติ ภิกฺขูนํ เตรสเก จตฺตาโร ภิกฺขุนีนํ สตฺตรสเก ภิกฺขูหิ อสาธารณา จตฺตาโรติ อฏฺฐ ฯ อฏฺฐหากาเรหิ กุลานิ ทูเสตีติ กุลานิ ทูเสติ ปุปฺเผน วา ผเลน วา จุณฺเณน วา มตฺติกาย วา ทนฺตกฏฺเฐน วา เวฬุนา วา เวชฺชิกาย วา ชงฺฆเปสนิเกน วาติ อิเมหิ อฏฺฐหิ ฯ อฏฺฐ มาติกา จีวรกฺขนฺธเก อปรา อฏฺฐ กฐินกฺขนฺธเก วุตฺตา ฯ อฏฺฐหิ อสทฺธมฺเมหีติ ลาเภน อลาเภน ยเสน อยเสน สกฺกาเรน อสกฺกาเรน ปาปิจฺฉตาย ปาปมิตฺตตาย ฯ โลกธมฺมา นาม ลาเภ สาราโค อลาเภ ปฏิวิโรโธ ยเส อยเส ปสํสาย นินฺทาย สุเข สาราโค ทุกฺเข ปฏิวิโรโธติ ฯ อฏฺฐงฺคิโก มุสาวาโทติ วินิธาย สญฺญนฺติ อิมินา สทฺธึ ปาลิยํ อาคเตหิ สตฺตหีติ อฏฺฐหิ องฺเคหิ อฏฺฐงฺคิโก ฯ

อฏฺฐ อุโปสถงฺคานีติ

ปาณํ น หญฺเญ น จาทินฺนมาทิเย

มุสา น ภาเส น จ มชฺชโป สิยา

อพฺรหฺมจริยา วิรเมยฺย เมถุนา

รตฺตึ น ภุญฺเชยฺย วิกาลโภชนํ

มาลํ น ธาเร น จ คนฺธมาจเร

มญฺเจ ฉมายํว สเยถ สนฺถเต

เอตํ หิ อฏฺฐงฺคิกมาหุโปสถํ

พุทฺเธน ทุกฺขนฺตคุนา ปกาสิตนฺติ

เอวํ วุตฺตานิ อฏฺฐ ฯ อฏฺฐ ทูเตยฺยงฺคานีติ อิธ ภิกฺขเว ภิกฺขุ โสตา จ โหติ สาเวตา จาติอาทินา นเยน สงฺฆเภทเก วุตฺตานิ ฯ ติตฺถิยวตฺตานิ มหาขนฺธเก นิทฺทิฏฺฐานิ ฯ อนติริตฺตา จ อติริตฺตา จ ปวารณสิกฺขาปเท นิทฺทิฏฺฐา ฯ อฏฺฐนฺนํ ปจฺจุฏฐาตพฺพนฺติ ภตฺตคฺเค วุฑฺฒภิกฺขุนีนํ อาสนมฺปิ ตาสํเยว ทาตพฺพํ ฯ อุปาสิกาติ วิสาขา ฯ อฏฺฐานิสํสา วินยธเรติ ปญฺจเก วุตฺเตสุ ปญฺจสุ ตสฺสาเธยฺโย อุโปสโถ ปวารณา สงฺฆกมฺมนฺติ อิเม ตโย ปกฺขิปิตฺวา อฏฺฐ เวทิตพฺพา ฯ อฏฺฐ ปรมานีติ ปุพฺเพ วุตฺตปรมาเนว อฏฺฐกวเสน โยเชตฺวา เวทิตพฺพานิ ฯ อฏฺฐสุ ธมฺเมสุ สมฺมาวตฺติตพฺพนฺติ น ปกตตฺตสฺส ภิกฺขุโน อุโปสโถ ฐเปตพฺโพ น ปวารณา ฐเปตพฺพาติอาทินา นเยน สมถกฺขนฺธเก นิทฺทิฏฺเฐสุ อฏฺฐสุ ฯ เสสํ สพฺพตฺถ อุตฺตานเมวาติ ฯ

อฏฺฐกวณฺณนา นิฏฺฐิตา ฯ