อุโปสถกรรมเป็นต้น

Uposathādipucchāvijsajjanavaṇṇanā

{332} uposathakammassa ko ādītiādīnaṃ pucchānaṃ vissajjane. Sāmaggī ādīti uposathaṃ karissāmāti sīmaṃ sodhetvā chandapārisuddhiṃ āharitvā sannipatitānaṃ kāyasāmaggī ādi. Kiriyā majjheti pubbakiccaṃ katvā pāṭimokkhaṃ osāraṇakriyā majjhe. Niṭṭhānaṃ pariyosānanti tattha sabbeheva samaggehi sammodamānehi avivadamānehi sikkhitabbanti idaṃ pāṭimokkhaniṭṭhānaṃ pariyosānaṃ. Pavāraṇākammassa sāmaggī ādīti pavāraṇaṃ karissāmāti sīmaṃ sodhetvā chandapavāraṇaṃ āharitvā sannipatitānaṃ kāyasāmaggī ādi. Kiriyā majjheti pavāraṇañatti ca pavāraṇakathā ca majjhe. Saṅghanavakassa passanto paṭikarissāmīti vacanaṃ pariyosānaṃ. Tajjanīyakammādīsu vatthu nāma yena vatthunā kammāraho hoti taṃ vatthu. Puggaloti yena taṃ vatthu kataṃ so puggalo. Kammavācā pariyosānanti kataṃ saṅghena itthannāmassa bhikkhuno tajjanīyakammaṃ khamati saṅghassa tasmā tuṇhī evametaṃ dhārayāmīti evaṃ tassā tassā kammavācāya avasānavacanaṃ pariyosānaṃ. Sesaṃ sabbattha uttānamevāti.

Uposathādivissajjanavaṇṇanā niṭṭhitā.