มาตรํ จีวรนฺติ อยํ คาถา ปิฏฺฐิสมเย วสฺสิกสาฏิกตฺถํ สตุปฺปาทกรณํ สนฺธาย วุตฺตา ฯ วินิจฺฉโย ปนสฺสา วสฺสิกสาฏิก- สิกฺขาปทวณฺณนายเมว วุตฺตํ ฯ กุทฺโธ อาราธโก โหตีติ คาถา ติตฺถิยวตฺตํ สนฺธาย วุตฺตา ฯ ติตฺถิโย หิ วตฺตํ ปูรยมาโน ติตฺถิยานํ วณฺเณ ภญฺญมาเน กุทฺโธ อาราธโก โหติ ฯ วตฺถุตฺตยสฺส วณฺเณ ภญฺญมาเน กุทฺโธ คารยฺโห โหตีติ ตตฺเถวสฺส วิตฺถาโร วุตฺโต ฯ ทุติยคาถาปิ ตเมว สนฺธาย วุตฺตา ฯ สงฺฆาทิเสสนฺติ อาทิคาถา ยา ภิกฺขุนี อวสฺสุตา อวสฺสุตสฺส ปุริสสฺส หตฺถโต ปิณฺฑปาตํ คเหตฺวา มนุสฺสมํสลสุณปณีตโภชนเสสอกปฺปิยมํเสหิ สทฺธึ โอมทฺทิตฺวา อชฺโฌหรติ ตํ สนฺธาย วุตฺตา ฯ เอโก อุปสมฺปนฺโน เอโก อนุปสมฺปนฺโนติ คาถา อากาสคตํ สนฺธาย วุตฺตา ฯ สเจ หิ ทฺวีสุ สามเณเรสุ เอโก อิทฺธิยา เกสคฺคมตฺตมฺปิ ปฐวึ มุญฺจิตฺวา นิสินฺโน โหติ ฯ โส อนุปสมฺปนฺโน นาม โหติ ฯ สงฺเฆนาปิ อากาเส นิสีทิตฺวา ภูมิคตสฺส กมฺมํ น กาตพฺพํ ฯ สเจ กโรติ กุปฺปติ ฯ อกปฺปกตนฺติ คาถา อจฺฉินฺนจีวรกํ ภิกฺขุํ สนฺธาย วุตฺตา ฯ ตสฺมึเยว จสฺสา สิกฺขาปเท วิตฺถาเรน วินิจฺฉโยปิ วุตฺโต ฯ น เทติ นปฺปฏิคฺคณฺหาตีติ นาปิ อุยฺโยชิกา เทติ น อุยฺโยชิตา ตสฺสา หตฺถโต คณฺหติ ฯ ปฏิคฺคโห เตน น วิชฺชตีติ เตเนว การเณน อุยฺโยชิตาย หตฺถโต อุยฺโยชิกาย ปฏิคฺคโห น วิชฺชติ ฯ อาปชฺชติ ครุกนฺติ เอวํ สนฺเตปิ อวสฺสุตสฺส หตฺถโต ปิณฺฑปาตคหเณ อุยฺโยเชนฺตี สงฺฆาทิเสสาปตฺตึ อาปชฺชติ ฯ ตญฺจ ปริโภคปจฺจยาติ ตญฺจ ปน อาปตฺตึ อาปชฺชมานา ตสฺสา อุยฺโยชิตาย ปริโภคปจฺจยา อาปชฺชติ ฯ ตสฺสา หิ โภชนปริโยสาเน อุยฺโยชิกาย สงฺฆาทิเสโส โหติ ฯ ทุติยคาถา ตสฺสาเยว อุทกทนฺตโปณคหเณ อุยฺโยชนํ สนฺธาย วุตฺตา ฯ น ภิกฺขุนี โน จ ผุเสยฺย วชฺชนฺติ สตฺตรสเกสุ หิ อญฺญตรํ อาปชฺชิตฺวา อนาทริเยน ฉาทยมานาปิ ภิกฺขุนี ฉาทนปจฺจยา วชฺชํ น ผุสติ อญฺญํ นวํ อาปตฺตึ นาปชฺชติ ฯ ปฏิจฺฉนฺนาย วา อปฺปฏิจฺฉนฺนาย วา อาปตฺติยา ปกฺขมานตฺตเมว ลภติ ฯ อยํ ปน ภิกฺขุนีปิ น โหติ สาวเสสญฺจ ครุกํ อาปชฺชิตฺวา ฉาเทตฺวา วชฺชํ น ผุสติ ฯ ปญฺหา เมสา กุสเลหิ จินฺติตาติ อยํ กิร ปญฺหา อุกฺขิตฺตกํ ภิกฺขุํ สนฺธาย วุตฺตา ฯ เตน หิ สทฺธึ วินยกมฺมํ นตฺถิ ตสฺมา โส สงฺฆาทิเสสํ อาปชฺชิตฺวา ฉาเทนฺโตปิ วชฺชํ น ผุสตีติ ฯ